काठमाडौं ।
दिक्तेल रुपाकोट मझुवागढी नगरपालिका–२ सोल्माका ३१ वर्षीय पङ्की राई ‘रोशन’ लाई वैदेशिक रोजगारीले खासै मन बहलाउन सकेन। त्यसलाई चटक्कै छाडेर उनी स्वदेश फर्किए।
विदेशमा रहँदा कम्पनी मालिकको खटन तथा आफ्नो देशप्रतिको मायाले १० महिना नबित्दै फर्किएका उनमा नेपालका पर्यटकीयस्थल घुम्ने र फोटो–भिडियोमार्फत अरुलाई घुमाउने सोख जाग्यो।
विदेशबाट फर्किएलगत्तै आफ्नो सोखअनुसार पर्यटकीयस्थलको फोटो तथा भिडियो कैद गर्न क्यामरा र ट्राइपडसहित बन्दोबस्तीका सामग्री बोकेर पङ्की नेपालका कुना–कन्दराका नियमित यात्री बने।
हरेक जिल्ला यात्राका क्रममा बटुलेको सुख, दुःख तथा पर्यटकीय सम्भावनाका क्षेत्रको फोटो तथा भिडियो पङ्कीले आफ्नो ‘पङ्की राई भ्लग तथा यूट्युब’मा राख्दै आएका छन्।
पछिल्लो समय नेपालका धार्मिक तथा पर्यटकीयस्थलको प्रवर्द्धनमा दिलोज्यान दिएर लागेका उनले यही साउन २२ गते विराटनगरमा आयोजित कोशी प्रदेशस्तरीय फोटोग्राफी प्रतियोगितामा ‘ट्रेल विधा’ तर्फ प्रथम उपाधि जिते।
कोशी प्रदेश सरकार, पर्यटन वन तथा वातावरण मन्त्रालयले आयोजना गरेको प्रतियोगितामा ३७ जना फोटोग्राफरलाई उछिन्दै उनले प्रथम उपाधि जितेका हुन्।
बिनातालिम गुगलका सामग्री अध्ययन गरेर फोटो तथा भिडियोग्राफर बनेका पङ्कीले कैद गरेको तस्वीरलाई प्रदेशस्तरीय फोटोग्राफी प्रतियोगितामा ‘घाँसेमैदान र गोठालाको जीवनः मुन्दुम पदमार्गको जीवन्त कथा’ शीर्षक दिइएको थियो।
कोशी प्रदेशको उत्कृष्ट फोटो बनेको त्यो तस्वीर नेपालको १०० पर्यटकीय गन्तव्यमा सूचीकृत मुन्दुम ट्रेल (पदमार्ग)को सालपा–सिलिचुङ क्षेत्रमा खिचिएको हो। विदेशबाट भाइले पठाइदिएको मोबाइलले खिचेको फोटोले प्रदेशस्तरीय फोटोग्राफी प्रतियोगिताको प्रथम उपाधि जिताएको उनले जानकारी दिए।
“मुन्दुम ट्रेल यात्राका क्रममा एउटा भाइले संरक्षित पोखरी नजिक भेडाको बथान चराउँदै थियो। मसँग भएको क्यामराको ब्याट्री सकिएको थियो। संयोगवश मैले आईफोन बोकेको थिएँ। त्यो मोबाइल फोन मेरो तुम्मा (ठूलीआमा)को छोरा आदित राई भाइले सिङ्गापुरबाट पठाइदिएको हो”, उनले भने, “अनि मैले फोटो खिच्छु है भनेर अनुमति लिएरै फोटो खिचेको थिएँ।”
“त्यतिबेला खिचेको फोटो प्रदेश उत्कृष्ट हुँदा खुसी लागेको छ। मोबाइल पठाइदिएकामा सिङ्गापुर पुलिसमा कार्यरत भाइ आदितलाई धेरै–धेरै धन्यवाद”, उनले भने।
विदेशबाट फर्किएपछि नौ वर्षदेखि फोटो तथा भिडियोग्राफीमा सक्रिय उनले प्रदेश उत्कृष्ट फोटोसँगै १०–१५ ओटा फोटो इन्स्टाग्राममार्फत पर्यटन वन तथा वातावरण मन्त्रालय, कोशी प्रदेशमा पठाएका थिए।
फोटो तथा भिडियोग्राफर पङ्कीले प्रदेश सरकारबाट प्राप्त उत्कृष्ट फोटोग्राफर उपाधिसँगै नगद ७० हजार रुपैयाँसमेत प्राप्त गरेका छन्।
प्रदेश सरकारले प्रदान गरेको यो उपाधिसँगै फोटो तथा भिडियोग्राफीका क्षेत्रमा थप सक्रियताका साथ लाग्नुपर्ने महसुस भएको उनले बताए। प्रदेशस्तरीय फोटोग्राफी प्रतियोगिता जितेपछि उत्साहित बनेका उनले आफ्नो फोटोग्राफी व्यावसायिक नभई सोख भएको जानकारी दिए।
आफूमा इच्छा, धैर्यता र लगनशीलता भए नसोचेको सफलता मिल्दोरहेछ भन्ने सन्देश यसपटक आफूले पाएको फोटोग्राफर पङ्कीले बताए। नेपालको पर्यटन प्रवर्द्धनका लागि हिमाल, पहाड तथा तराईका विभिन्न स्थानमा डुलेर फोटो तथा भिडियो सङ्कलन गरिरहेको उनले जानकारी दिए।
देश तथा विदेशमा रहेका पर्यटकलाई नदेखिएको तथा नपुगेको नेपालका पर्यटकीयस्थल देखाउने र पर्यटन प्रवर्द्धन गराउने उनको मुख्य ध्येय छ। पछिल्लो समय जिल्लामा उनीजस्तै अन्य युवाले पनि फोटो तथा भिडियोग्राफीमार्फत धार्मिक तथा पर्यटकीय क्षेत्रको प्रवर्द्धन गरिरहेका छन्।
कोशी प्रदेश सरकार, पर्यटन वन तथा वातावरण मन्त्रालयले हरेक वर्ष विभिन्न विधामा फोटोग्राफी प्रतियोगिता गर्दै आएको छ। प्रदेशभित्र रहेका धार्मिक तथा पर्यटकीयस्थलको प्रवर्द्धन गर्न मन्त्रालयले हरेक वर्ष फोटोग्राफी प्रतियोगिता आयोजना गर्दै आएको प्रवक्ता अखिलेशकुमार गुप्ताले जानकारी दिए।-रासस
प्रकाशित: २५ श्रावण २०८३, सोमबार
