उद्यमशीलता केन्द्रित समुदाय ‘नेटवर्क स्कुल’ बन्द गर्न मलेसिया सरकारको निर्देशन

काठमाडौं ।

मलेसिया सरकारले उद्यमशीलता केन्द्रित समुदाय ‘नेटवर्क स्कुल’ बन्द गर्न निर्देशन दिएको बताइएको छ। द वाल स्ट्रिट जर्नलका अनुसार लाइसेन्ससम्बन्धी समस्याका कारण उक्त कार्यक्रम सञ्चालन भइरहेको क्याम्पस बन्द गर्न आदेश दिइएको हो।

‘प्रविधिप्रेमी आशावादीहरूको अग्रणी समुदाय’ भनेर चिनाउने नेटवर्क स्कुल उद्यमी तथा लगानीकर्ता बालाजी श्रीनिवासनको अवधारणाबाट सुरु भएको हो। उनले अमेरिकाको दीर्घकालीन भविष्यप्रति निराशा व्यक्त गर्दै “नयाँ देश स्थापना गर्ने” आफ्नो लक्ष्य रहेको बताउँदै आएका छन्।

श्रीनिवासनले लेखेको पुस्तक द नेटवर्क स्टेटमा उल्लेख गरिएको सात चरणको योजनाअनुसार नेटवर्क स्कुललाई नयाँ समाज निर्माणको पहिलो चरणका रूपमा प्रस्तुत गरिएको छ।

द वाल स्ट्रिट जर्नलका अनुसार मलेसियाको परित्यक्त होटलमा सञ्चालन भइरहेको यो कार्यक्रम प्रविधि स्टार्टअप इन्क्युबेटर र आत्मविकास शिविरको मिश्रणजस्तै थियो। तर सहभागीहरूले कोठामा ढुसी लागेको, महिला सहभागीको संख्या कम भएको तथा रात्रिकालीन गतिविधिको अभाव रहेको गुनासो गरेका टेकक्रञ्चले उल्लेख गरेको छ।

वाल स्ट्रिट जर्नलबाट प्रश्न आएपछि श्रीनिवासनले एक्समा लामो पोस्ट गर्दै आफू “गर्वित सिङ्गापुरवासी” भएको बताएका थिए। उनले उक्त समाचारलाई आफूलाई “प्रारम्भिक प्रविधि अपनाउने व्यक्ति” का सट्टा “अनौठो व्यक्ति” जस्तो देखाउने प्रयास भएको आरोप पनि लगाए।

हालको मलेसियास्थित क्याम्पस लाइसेन्ससम्बन्धी कारणले बन्द गर्नुपर्ने भए पनि श्रीनिवासनले हालै काजाखस्तानमा नयाँ क्याम्पस सञ्चालनका लागि सम्झौता भएको घोषणा गरेका छन्।