काठमाडौं ।
भर्जिन मिडिया ओटू ले ग्राहक सेवा सुधार योजनालाई अघि बढाउँदै वरिष्ठ व्यवस्थापनमा महत्वपूर्ण परिवर्तनसहित संगठन पुनर्संरचना गरेको छ।
ब्रिटेनको यस टेलिकम कम्पनीले आफ्ना कमर्सियल तथा डाटा र अपरेसन्स डिभिजनलाई गाभेर नयाँ कन्ज्युमर डिभिजन गठन गरेको छ। कम्पनीले आफूसँग रहेको डाटाको प्रभावकारी उपयोग गर्दै ग्राहकलाई अझ राम्रो अनुभव प्रदान गर्ने लक्ष्य राखेको छ।
रिटेल, ग्राहक सेवा, डाटा तथा इनसाइट्स, ट्रेडिङ, प्रस्ताव विकास र डिजिटल गतिविधिलाई दुईवटा डिभिजनको सट्टा एउटै डिभिजनअन्तर्गत ल्याइएकाले निर्णय प्रक्रिया थप सरल र छिटो हुने कम्पनीले जनाएको छ।
नयाँ संरचनाअनुसार लिसा म्याकगोवन कन्ज्युमर डिभिजनको प्रमुख बनेकी छन्। उनले प्रमुख कार्यकारी अधिकृत लुट्ज शुलरलाई प्रत्यक्ष रिपोर्ट गर्नेछन्।
“यो बजार अत्यन्त प्रतिस्पर्धी र तीव्र रूपमा परिवर्तन भइरहेको छ। पहिले जसरी काम गर्दै आएका थियौं त्यसले मात्र पुग्दैन। हामीलाई अझ सरल, छिटो र केन्द्रित हुनुपर्छ,” शुलरले भने। “यी परिवर्तनले त्यही लक्ष्य पूरा गर्नेछन्। नयाँ कन्ज्युमर डिभिजनको नेतृत्वका लागि लिसा उपयुक्त व्यक्ति हुन्। उनीसँग व्यापक अनुभव छ र उनले कार्यकारी टोलीमा नयाँ सोच र सकारात्मक चुनौती ल्याउनेमा मलाई पूर्ण विश्वास छ।”
टेलिकम्स डटकमका अनुसार म्याकगोवन यसअघि घरपालुवा जनावरका सामग्री बिक्री तथा पशु चिकित्सकीय सेवा प्रदायक कम्पनी पेट्स एट होमकी प्रमुख कार्यकारी अधिकृत थिइन्। उनले सेप्टेम्बर २०२५ मा कम्पनी छाडेकी थिइन्।
त्यसअघि कम्पनीले सोही वर्ष दोस्रो पटक नाफा घट्ने चेतावनी जारी गरेको थियो। मुद्रास्फीतिका कारण उपभोक्ताले वैकल्पिक खर्च घटाउँदा कम्पनीको कारोबार प्रभावित भएको थियो र उनको कार्यकालमा कम्पनीको सेयर मूल्य पनि करिब एक तिहाइले घटेको थियो।
यसअघि भने उनले १० वर्षभन्दा बढी समय स्काईमा काम गरेकी थिइन्। त्यहाँ उनले अन्तिम पटक प्रमुख उपभोक्ता अधिकृतका रूपमा मोबाइल, ब्रोडब्यान्ड र टेलिभिजन व्यवसायको नेतृत्व गरेकी थिइन्।
“टेलिकम क्षेत्रमा पुनः फर्किएर यस्तो महत्वपूर्ण समयमा भर्जिन मिडिया ओ२को टोलीसँग आबद्ध हुन पाउनु गौरवको विषय हो। बेलायतका चर्चित ब्रान्डहरू र ग्राहकलाई केन्द्रमा राख्ने स्पष्ट लक्ष्यका साथ एउटै कन्ज्युमर डिभिजन गठन गर्नु रणनीतिक रूपमा सही निर्णय हो। पहिलो दिनदेखि नै टोलीसँग काम गर्न उत्साहित छु,” म्याकगोवनले भनिन्।
नयाँ संरचनापछि प्रमुख कमर्सियल अधिकृत क्रिस्टियन हिन्डेनाख र प्रमुख सञ्चालन अधिकृत रोब ओर कम्पनीबाट बाहिरिने भएका छन्।
“रोब र क्रिस्टियन दुवैले धेरै वर्षसम्म कम्पनीप्रति समर्पित भएर काम गरे। नयाँ कन्ज्युमर संगठनको परिकल्पना तयार गर्न उनीहरूको महत्वपूर्ण योगदान रहेको छ,” शुलरले भने।
हालका वर्षहरूमा भीएम ओटूले ग्राहक सेवा सुधारमा विशेष ध्यान दिएको छ। त्यसको परिणामस्वरूप बेलायती नियामक अफकममा ग्राहक गुनासो घटेको छ भने फिक्स्ड लाइन व्यवसायमा ग्राहक गुमाउने दर पनि उल्लेखनीय रूपमा कम भएको कम्पनीले जनाएको छ।
मोबाइल नेटवर्क स्तरोन्नति र फाइबर नेटवर्क विस्तारलाई पनि निरन्तर अघि बढाइरहेको भीएम ओटूले अब भोडाफोनथ्री र तीव्र गतिमा फाइबर विस्तार गरिरहेको बीटीसँग प्रतिस्पर्धा गरिरहेको छ। नयाँ कन्ज्युमर डिभिजन र म्याकगोवनको नेतृत्वले यस गतिलाई कसरी अघि बढाउँछ भन्ने चासोका साथ हेरिएको छ।
प्रकाशित: २० असार २०८३, शनिबार
