काठमाडौं ।
नेपालमा दिगो डिजिटल इकोसिस्टम निर्माण गर्ने उद्देश्यका साथ लुम्बिनी टेक इनोभेसन सेन्टर र अपकोड नेपालबीच नेपालमा आधुनिक र डिजिटल फोहोर व्यवस्थापन प्रणाली लागू गर्नका लागि औपचारिक रूपमा समझदारी पत्र मा हस्ताक्षर भएको छ।
यो रणनीतिक साझेदारीले नेपालका शहरी क्षेत्रहरूमा विद्यमान फोहोर व्यवस्थापनको चुनौतीलाई प्रविधिको माध्यमबाट समाधान गर्ने लक्ष्य राखेको छ।
डिजिटल प्रणाली मार्फत फोहोर व्यवस्थापनमा नयाँ आयाम
यस सहकार्यले परम्परागत र अव्यवस्थित फोहोर संकलन प्रक्रियालाई विस्थापित गरी एकीकृत डिजिटल फोहोर व्यवस्थापन प्रणाली स्थापना गर्न जोड दिनेछ।
सम्झौताको महत्त्वबारे प्रस्ट पार्दै लुम्बिनी टेक इनोभेसन सेन्टरका संस्थापक अध्यक्ष धन बहादुर रानाले भने, “नेपालमा फोहोर व्यवस्थापन प्रणालीको डिजिटलाइजेसन डिजिटल इकोसिस्टम निर्माणको क्षेत्रमा एउटा ऐतिहासिक कोशढुङ्गा हो। प्रविधिको प्रयोगले हाम्रा समुदायहरूलाई स्वच्छ र स्मार्ट बनाउन मद्दत गर्नेछ।”
तल्लो तहसम्म प्रविधिको पहुँच
यो नयाँ डिजिटल प्रणालीलाई अत्यन्तै सरल र व्यावहारिक बनाइएको छ, जसले गर्दा साना स्थानीय तहहरूले पनि यसलाई सजिलै अपनाउन सक्छन्।
अपकोड नेपालका संस्थापक प्राविधिक निर्देशक मङ्गल प्रधानले भने, “यो सम्झौताले फोहोर व्यवस्थापनको आधुनिकीकरणलाई सिधै तल्लो तहसम्म पुर्याउनेछ। प्रविधिले स्थानीय फोहोर संकलक र प्रत्येक घरधुरीलाई जिम्मेवार बनाउन र सेवा सुधार गर्न मद्दत गर्नेछ।”
डिजिटल फोहोर व्यवस्थापन प्रणालीका मुख्य विशेषताहरू
यो सफ्टवेयर नगरपालिका, निजी फोहोर संकलक, रिसाइकल केन्द्र र कर्पोरेट क्याम्पसहरूका लागि विशेष रूपमा तयार पारिएको हो। यो प्रणाली वेब एप्लिकेसन र मोबाइल एप्लिकेसन दुवै रूपमा उपलब्ध छ। यसका मुख्य फाइदाहरू यस प्रकार छन्:
लागतमा कटौती: फोहोर उठाउने गाडीहरूको रुट र समय तालिका मिलाएर सञ्चालन खर्च घटाउँछ।
रिसाइकलमा वृद्धि: पुन: प्रयोग गर्न मिल्ने (Recyclable) फोहोरलाई ढुवानीदेखि केन्द्रसम्म ट्र्याक गरी डम्पिङ साइटमा जाने फोहोरको मात्रा कम गर्छ।
पूर्ण पारदर्शी: सुपरभाइजर र अधिकारीहरूका लागि दैनिक फोहोर संकलनको अवस्था र नागरिकका गुनासोहरू रियल-टाइममा हेर्न मिल्ने ड्यासबोर्ड।
प्रकाशित: ३१ जेष्ठ २०८३, आईतवार
