काठमाडौं ।
ब्लु ओरिजिनको विशाल न्यू ग्लेन रकेटको इन्जिन परीक्षणका क्रममा गत साता भएको विस्फोटबाट क्षतिग्रस्त प्रक्षेपण स्थल मर्मत गर्न “निकै समय लाग्ने” भएको छ। यसबारे नासाका प्रशासक ज्यारेड इसाकम्यानले सोमबार सीएनबीसीसँगको अन्तर्वार्तामा बताएका हुन्। उनका अनुसार सन् २०२८ सम्मको समयसीमा “सम्भावनाको दायराभित्र” रहेको छ।
जनवरी २०२५ यता कक्षामा पठाइने चौथो उडानको तयारीस्वरूप नियमित स्थिर ‘हट-फायर’ परीक्षण गरिने क्रममा गत बिहीबार दुई चरणयुक्त शक्तिशाली रकेट प्रक्षेपण टावरमै बाँधिएको अवस्थामा विशाल आगोको गोलासहित विस्फोट भएको थियो।
रोयटर्सका अनुसार यो घटना अर्बपति जेफ बेजोसको ब्लु ओरिजिन र अमेजनको उपग्रह परियोजनाका लागि महत्वपूर्ण समयमा भएको हो। बेजोसले विश्वकै अग्रणी निजी अन्तरिक्ष प्रक्षेपण सेवा कम्पनी स्पेसएक्ससँग प्रतिस्पर्धा गर्ने प्रयास गरिरहेका छन्।
कम्पनी तथा उद्योग स्रोतहरूले सप्ताहन्तमा दिएको जानकारीअनुसार विस्फोटले प्रक्षेपण स्थललाई लगभग पूर्ण रूपमा ध्वस्त बनाएको छ। इन्जिनियरहरूले मर्मत कार्यका कारण कम्तीमा छ महिनासम्म सञ्चालन प्रभावित हुने अनुमान गरेका छन्।
सौभाग्यवश, फ्लोरिडाको केप क्यानाभेरलस्थित अमेरिकी अन्तरिक्ष बलको प्रक्षेपण केन्द्रमा भएको उक्त दुर्घटनामा कुनै मानवीय क्षति भएको छैन। साथै रकेटले कक्षामा लैजान तय गरिएका अमेजनका लिओ उपग्रहहरू पनि घटनाको समयमा रकेटमा जडान गरिएको थिएन।
पृथ्वीको परिक्रमा गर्ने पहिलो अमेरिकी अन्तरिक्षयात्री जोन ग्लेनको नाममा राखिएको न्यू ग्लेन रकेटले नासाको आर्टेमिस चन्द्र अभियानअन्तर्गत चन्द्र अवतरण यान र अन्य सामग्री ढुवानीमा महत्वपूर्ण भूमिका खेल्ने अपेक्षा गरिएको छ।
प्रकाशित: १९ जेष्ठ २०८३, मंगलवार
