काठमाडौं ।
दक्षिण कोरियाको एसके हाइनिक्सले बिहीबार आफ्नो त्रैमासिक नाफामा पाँच गुणा वृद्धि गर्दै रेकर्ड कायम गरेको छ र एआई चिपको माग उत्पादन क्षमताभन्दा बढी हुने पूर्वानुमान गरेको छ। यसले ठूला प्रविधि कम्पनीहरूमा एआई खर्च घट्ने चिन्तालाई कम गरेको छ।
एनभिडियाका आपूर्तिकर्ता रहेको कम्पनीको यो पूर्वानुमानले एआई चिपसेटमा प्रयोग हुने हाई ब्यान्डविड्थ मेमोरी (एचबीएम) चिपहरूको माग अझै बलियो रहेको संकेत दिएको छ, जसले आपूर्ति सीमित राख्दै मूल्य उच्च बनाइरहेको छ।
“आगामी तीन वर्षका लागि (एचबीएम) चिप आपूर्तिका ग्राहक मागहरू हाम्रो उत्पादन क्षमताभन्दा पहिले नै धेरै बढी छन्,” एचबीएम बिक्री तथा मार्केटिङ प्रमुख की ते किमले आम्दानी सम्बन्धी छलफलमा बताएका छन्।
सामसङ इलेक्ट्रोनिक्सपछि विश्वको दोस्रो ठूलो मेमोरी चिप निर्माता कम्पनीले मध्यपूर्वको युद्धबाट सीमित प्रभाव पर्ने पनि जनाएको छ। कम्पनीले आवश्यक रसायनहरूको आपूर्ति विविधिकरण गर्नुका साथै भण्डारण सुरक्षित गरेको र दीर्घकालीन सम्झौतामार्फत ऊर्जा सुनिश्चित गरेकोले मूल्य अस्थिरताको प्रभाव न्यून हुने बताएको छ।
बजार विश्लेषक संस्था ट्रेण्डफोर्स का अनुसार केही डीआरएएम चिपहरूको करार मूल्य पहिलो त्रैमासमा अघिल्लो त्रैमासको तुलनामा करिब ८३ प्रतिशतले बढेको छ भने केही एनएएनडी उत्पादनको मूल्य झण्डै १६० प्रतिशतले उकालो लागेको छ। एआई पूर्वाधारका लागि चिप सुनिश्चित गर्न प्रविधि कम्पनीहरूबीच प्रतिस्पर्धा बढेसँगै चालु त्रैमासमा पनि मूल्य वृद्धि जारी रहने अपेक्षा गरिएको छ।
विश्लेषकहरूका अनुसार दोस्रो त्रैमासपछि मूल्य वृद्धिको गति केही घट्न सक्छ, तर नयाँ उत्पादन क्षमता निर्माण सुरु भएर सञ्चालनमा आउन एक वर्षभन्दा बढी समय लाग्ने भएकाले आपूर्ति अभाव भने कायम रहनेछ।
एसके हाइनिक्सले एआईबाट प्रेरित मागले पीसी र स्मार्टफोन निर्माता कम्पनीहरूको कमजोर मागलाई सन्तुलन गर्ने भएकाले “हालका लागि” मूल्य अवस्था अनुकूल रहने अपेक्षा गरेको छ।
मूल कम्पनी एसके ग्रुप का अध्यक्ष चे ताए-वोनले गत महिना एआईबाट प्रेरित माग आपूर्तिभन्दा बढी रहने भएकाले विश्वव्यापी चिप वेफर अभाव सन् २०३० सम्म जारी रहने सम्भावना रहेको बताएका थिए।
एसके हाइनिक्सले बढ्दो माग पूरा गर्न दक्षिण कोरियामा नयाँ चिप प्लान्टको उद्घाटन अघि सार्ने लगायत उत्पादन क्षमता विस्तार तीव्र बनाएको जनाएको छ।
कम्पनीले यस वर्षको लगानी अघिल्लो वर्षको ३०.२ ट्रिलियन वोन (२०.३७ अर्ब डलर) भन्दा उल्लेखनीय रूपमा बढ्ने बताउँदै योङइन क्लस्टरमा पूर्वाधार निर्माण, एम१५एक्स फ्याब विस्तार र आवश्यक उपकरण सुनिश्चित गर्न केन्द्रित हुने जनाएको छ।
मार्चमा एसके हाइनिक्सले सन् २०२७ सम्म एएसएमएलबाट ११.९५ ट्रिलियन वोन बराबरका ईयूभी लिथोग्राफी उपकरण खरिद गर्ने जनाएको थियो।
कम्पनीले लाभांश, सेयर पुनःखरिद र रद्द गर्ने लगायत सेयरधनी प्रतिफलका उपायहरूबारे समीक्षा गरिरहेको र यस वर्षभित्र योजना अन्तिम गर्ने लक्ष्य राखेको पनि जनाएको छ।
एसके हाइनिक्सले जनवरी–मार्च अवधिमा ३७.६ ट्रिलियन वोन सञ्चालन नाफा कमाएको छ, जुन एक वर्षअघिको ७.४ ट्रिलियन वोनभन्दा धेरै हो।
यो नतिजा एलएसईजी स्मार्टएस्टिमेटको ३७.९ ट्रिलियन वोन अनुमानसँग मिल्दोजुल्दो रहेको छ। त्रैमासिक आम्दानी १९८ प्रतिशतले बढेर ५२.६ ट्रिलियन वोन पुगेको छ।
एसके हाइनिक्सको सेयर मूल्य बिहानको कारोबारमा २.१ प्रतिशतले बढेको छ, जबकि कोस्पी सूचकांक १.२ प्रतिशत ले उकालो लागेको छ।
यस वर्ष अहिलेसम्म कम्पनीको सेयर झण्डै ९० प्रतिशतले बढेको छ र बजार मूल्य करिब ५९० अर्ब डलर पुगेको छ, जसले युरोपको सबैभन्दा मूल्यवान कम्पनी एएसएमएलको ५७० अर्ब डलरलाई उछिनेको छ।
प्रकाशित: ११ बैशाख २०८३, शुक्रबार
