काठमाडौं ।
एपफिगर्स नामक बजार विश्लेषण कम्पनीको नयाँ अध्ययनअनुसार २०२६ को पहिलो त्रैमासिकमा विश्वभर नयाँ एपहरूको लन्च संख्या अघिल्लो वर्षको तुलनामा ६० प्रतिशतले बढेको छ।
यसमा एप्पलको एप स्टोर र गुगल प्ले दुवै समावेश छन्। आईओएस एप स्टोरमा मात्रै हेर्दा यो वृद्धि ८० प्रतिशत पुगेको छ। २०२६ को अप्रिल महिनामा हालसम्म एप लन्च संख्या दुवै स्टोरमा १०४ प्रतिशतले बढेको छ भने आईओएसमा ८९ प्रतिशत वृद्धि देखिएको छ।
टेकक्रञ्चका अनुसार एप्पलका विश्वव्यापी बजारीकरण प्रमुख ग्रेग “जोज” जोसवियाकले हालैको अन्तर्वार्तामा एआईको युगमा एप स्टोर समाप्त हुने हल्ला “अत्यधिक बढाइचढाइ गरिएको” बताएका छन्।
एआई च्याटबट र एजेन्टहरूको वृद्धि भएपछि प्रयोगकर्ताहरू एपबाट टाढा जान सक्छन् भन्ने चिन्ताबीच यी तथ्याङ्क आएका हुन्। नथिङका प्रमुख कार्ल पेईजस्ता उद्योगका केही व्यक्तिहरूले एआई युगका लागि नयाँ प्रकारका स्मार्टफोन बनाउने कुरा गर्दै यस्तो सम्भावनाबारे चर्चा गरिरहेका छन्।
द न्यूयोर्क टाइम्सले पनि गत वर्ष स्मार्ट ग्लास, एम्बिएन्ट कम्प्युटिङ उपकरण वा एआईयुक्त स्मार्टवाच जस्ता नयाँ प्लेटफर्मले स्मार्टफोनलाई प्रतिस्थापन गर्न सक्ने सम्भावनाबारे उल्लेख गरेको थियो।
ओपनएआईले पनि एप्पलका प्रसिद्ध डिजाइनर जोनी आईभसँग मिलेर एआई हार्डवेयर उपकरणमा काम गरिरहेको छ।
तर अर्को सम्भावना पनि देखिएको छ—एआईले एप बनाउन सजिलो बनाउँदै एप स्टोरमा नयाँ पुनर्जागरण ल्याउन सक्छ। प्राविधिक सीप नभएका तर नयाँ विचार भएका सिर्जनाकर्ताहरूले नयाँ एपहरूको लहर ल्याउन सक्ने अनुमान गरिएको छ।
एपफिगर्सको तथ्याङ्कअनुसार केही एप श्रेणीमा लन्च बढी भइरहेको छ। २०२६ को पहिलो त्रैमासिकमा मोबाइल गेमहरू अझै सबैभन्दा बढी नयाँ एपका रूपमा रहेका छन्।
“प्रडक्टिभिटी” एपहरू शीर्ष पाँचमा पुगेका छन्। “युटिलिटी” श्रेणीका एपहरु दोस्रो स्थानमा पुगेको छ भने “लाइफस्टा
इल” एपहरू पाँचौँ स्थानबाट तेस्रो स्थानमा उक्लिएका छन्। “हेल्थ एण्ड फिटनेस” एपहरू पनि शीर्ष पाँचमा परेका छन्।
क्लोड कोड वा रेप्लिटजस्ता एआई उपकरणहरूले एप विकास सजिलो बनाएको कारण यस्तो वृद्धि भएको हुनसक्ने अनुमान गरिएको छ। अहिले एआई प्रयोग गर्न सजिलो हुँदै गएकाले मानिसहरूले छिटो आफ्नै मोबाइल एप बनाउन सक्ने अवस्था आएको देखिन्छ।
नयाँ एपहरूको बाढीले एप्पललाई केही समस्या पनि दिएको देखिन्छ। यसै साता कम्पनीले नियम उल्लङ्घनका कारण फ्रीक्याश नामक रिवार्ड एपलाई एप स्टोरबाट हटाएको थियो, जुन लामो समयसम्म शीर्ष पाँचमा परेको थियो। साथै लेजर लाइभ को नक्कली क्रिप्टो एपले प्रयोगकर्ताबाट ९.५ मिलियन डलर बराबरको क्रिप्टो चोरी गरेको घटनाले पनि एप्पललाई अचम्ममा पारेको थियो।
यस्ता घटनाले नकारात्मक प्रभाव पार्न सक्छन् तर एप्पलले जोखिमपूर्ण वा स्प्याम एपहरू रोक्न ठूलो भूमिका खेलेको छ। २०२४ मा मात्रै कम्पनीले १७,००० भन्दा बढी एपहरू नियम उल्लङ्घनका कारण हटाएको वा अस्वीकार गरेको जनाएको छ।
त्यस्तै ३२०,००० भन्दा बढी एप सबमिसन स्प्याम, नक्कल वा भ्रामक भएकाले अस्वीकार गरिएको थियो र ३७,००० भन्दा बढी सम्भावित ठगी एपहरू प्रयोगकर्तासम्म पुग्नबाट रोकेको थियो।
तथापि, विश्लेषक जोन ग्रुबरजस्ता व्यक्तिहरूले लोकप्रिय हुँदै गएका ठगी एपहरू निगरानी गर्न विशेष टोली आवश्यक भएको बताएका छन्।
यदि एआई सहयोगमा एप बनाउने प्रवृत्ति नै यो वृद्धिको मुख्य कारण हो भने भविष्यमा अझ धेरै नयाँ एपहरू बजारमा आउने र यसमा सबै सुरक्षित नहुन पनि सक्ने टेकक्रञ्चले उल्लेख गरेको छ।
प्रकाशित: ७ बैशाख २०८३, सोमबार
