काठमाडौं ।
स्विडेनको नेटवर्क उपकरण निर्माता एरिक्शनले २०२६ को पहिलो त्रैमासिकमा अधिकांश क्षेत्रमा सामान्य वृद्धि हासिल गरे पनि आपूर्ति शृङ्खलासम्बन्धी चुनौती जारी रहने चेतावनी दिएको छ।
मोबाइल नेटवर्क उपकरण बजार लामो समयदेखि स्थिर रहेकाले यस्तो अवस्थामा ६ प्रतिशत वार्षिक जैविक (अर्गानिक) बिक्री वृद्धि हासिल गर्नु राम्रो उपलब्धि भएको कम्पनीले जनाएको छ। तर समायोजनअघि भने बिक्री १० प्रतिशतले घटेको थियो, जसको मुख्य कारण अघिल्लो वर्षको तुलनामा स्विडिश क्रोना बलियो हुनु हो।
एरिक्शनले अनिश्चित अवस्थामा पनि राम्रो कार्यसम्पादनमा जोड दिएको छ। इरानसँगको द्वन्द्वले विश्व अर्थतन्त्रमा दबाब सिर्जना गरिरहेको भए पनि एआई डाटा सेन्टरको तीव्र विस्तारका कारण उत्पन्न कम्पोनेन्ट अभाव कम्पनीका लागि ठूलो चुनौती बनेको छ।
टेलिकम्स डटकमका अनुसार कम्पनीका नेटवर्क प्रमुख पर नार्भिङ्गरले थ्री एनएम सेमिकन्डक्टर उत्पादन क्षमताका लागि कडा प्रतिस्पर्धा भइरहेको र यही समस्या प्रमुख चुनौती भएको बताएका छन्।
यद्यपि कम्पनीले उत्तर अमेरिका बाहेक सबै क्षेत्र र सबै व्यवसाय खण्डमा वृद्धि हासिल गरेको छ। अमेरिकामा आएको गिरावटका लागि टीएमयूएसले यूएस सेलुलर खरिद गरेको घटनालाई कारण मानिएको छ। नार्भिङ्गरले जापान र भारतलाई राजस्व वृद्धिका महत्वपूर्ण स्रोतका रूपमा उल्लेख गरेका छन्।
एरिक्शनका प्रमुख कार्यकारी बोर्य एक्होमले भने, “हाम्रो पहिलो त्रैमास नतिजाले गतिशील वातावरणमा पनि स्थायित्व देखाएको छ, जहाँ ६ प्रतिशत जैविक बिक्री वृद्धि भएको छ। राम्रो ग्रस मार्जिन र बलियो नगद प्रवाहले पछिल्ला वर्षहरूमा गरिएको प्रगतिलाई देखाउँछ।”
उनले थपे, “भूराजनीतिक र आर्थिक अनिश्चितताबीच पनि ग्राहकलाई सेवा दिन सक्षम हुने गरी विविध र बलियो आपूर्ति शृङ्खला निर्माणमा गरिएको दीर्घकालीन लगानीले मद्दत गरेको छ। एआईको मागका कारण विशेषगरी सेमिकन्डक्टरको लागत बढेको छ। हामी ग्राहक र आपूर्तिकर्तासँग सहकार्य, उत्पादन विकल्प र कार्यक्षमता सुधारमार्फत यी चुनौती कम गर्ने प्रयासमा छौँ।”
उनले आगामी दिनमा रेडियो एक्सेस नेटवर्क बजार स्थिर रहने अपेक्षा गरे पनि कम्पनीको रणनीति, उत्पादन पोर्टफोलियो र इन्टरप्राइज तथा अत्यावश्यक सेवामा बलियो उपस्थितिका कारण बजारभन्दा छिटो वृद्धि गर्ने विश्वास व्यक्त गरे।
अपेक्षाभन्दा केही कम नतिजा र चिप लागतसम्बन्धी चेतावनीका कारण सुरुमा कम्पनीको शेयर मूल्य घटेको थियो। तर पछि पुनः सुधार भएको देखिएको छ, जसले लगानीकर्ताले कम्पनीका योजनामा विश्वास गरेको संकेत गर्छ।
स्थिर बजारमा पनि वृद्धि देखिनुले केही बजार हिस्सा बढेको संकेत गर्छ र सफ्टवेयर व्यवसायको सकारात्मक दृष्टिकोण पनि उत्साहजनक रहेको छ।
प्रकाशित: ७ बैशाख २०८३, सोमबार
