काठमाडौं ।
भोडाफोन र डब्लूडब्लूएफले “दिगो घुम्ती अर्थतन्त्रतर्फको परिवर्तनलाई प्रोत्साहन गर्न” सुरु गरिएको योजनाअन्तर्गत १० लाख मोबाइल फोन संकलन गरेका छन्।
यस अभियानबाट विभिन्न जलवायु र प्रकृतिसम्बन्धी अन्तर्राष्ट्रिय संरक्षण परियोजनाका लागि १० लाख पाउण्ड संकलन भएको छ, र संकलित प्रत्येक फोनका लागि भोडाफोनले १ पाउण्ड सहयोग गरेको छ।
‘वन मिलियन फोन्स फर द प्लानेट’ नामको यो योजना नोभेम्बर २०२२ मा सुरु गरिएको थियो, जसले युरोप र अफ्रिकाभरका मानिसलाई प्रयोगमा नआएका मोबाइल फोन ट्रेड-इन, दान वा पुनःप्रयोगका लागि दिन आह्वान गरेको थियो।
संकलित १० लाख पाउण्ड डब्लूडब्लूएफ का संरक्षण कार्यमा खर्च गरिनेछ, जसमा कोलम्बियाको सेरानिया डे मानाकाकियास नेशनल पार्कमा नयाँ राष्ट्रिय निकुञ्ज स्थापना, ब्राजिलमा विकसित अर्थ इञ्जिन एपमार्फत वास्तविक समयको वातावरणीय तथ्यांक देखाउने प्रणाली, विभिन्न देशमा जंगली बाघको संख्या वृद्धि, र तान्जानियामा दिगो माछा मार्ने अभ्यासका लागि तालिम समावेश छन्।
टेलिकम्स डटकमका अनुसार यो योजना सुरु भएदेखि भोडाफोनले युरोप र अफ्रिकाभर प्रजाति संरक्षणका लागि डब्लूडब्लूएफ का प्रयासमा सहयोग गर्दै आएको छ।
बेलायतमा १०० वर्षपछि पहिलो पटक फर्थ अफ फोर्थ क्षेत्रमा सिपी र समुद्री घाँस पुनःस्थापना गरिएको छ, केन्यामा सिंह र हात्ती जस्ता वन्यजन्तु संरक्षणका लागि निगरानी प्रविधि प्रयोग गरिएको छ, ग्रीसमा समुद्री संरक्षण र दिगो माछा व्यवसायमा सहयोग गरिएको छ, जर्मनीमा युरोपेली बाइसन फिर्ता ल्याउने काम गरिएको छ, र दक्षिण अफ्रिकामा कालो गैंडा सार्ने, संरक्षण क्षेत्र विस्तार गर्ने तथा मोबाइल र एआईमा आधारित निगरानीमार्फत माछा व्यवसायलाई सहयोग गरिएको छ।
भोडाफोनले आफ्नो अन्तर्राष्ट्रिय क्षेत्रमा मोबाइल फोनको आयु बढाउन मर्मत र पुनःप्रयोगमा पनि काम गरिरहेको जनाएको छ, जसअन्तर्गत रिकमर्सजस्ता साझेदारसँग मिलेर उपकरण मर्मत गरेर पुनःबिक्री गरिन्छ।
भोडाफोन समूहका प्रमुख बाह्य तथा कर्पोरेट मामिला अधिकृत जोआकिम रेइटरले भने, “पृथ्वीका लागि १० लाख फोन संकलन हुनु साना दैनिक कामबाट पनि ठूलो परिवर्तन सम्भव हुन्छ भन्ने देखाउँछ। डब्लूडब्लूएफ सँगको हाम्रो सहकार्यले प्रयोगमा नआएका फोनलाई संरक्षणका लागि रकममा रूपान्तरण गरेको छ र घुम्ती अर्थतन्त्रको व्यवहारिक उदाहरण बनेको छ। हामी आफ्ना ग्राहकप्रति आभारी छौं।”
डब्लूडब्लूएफ-यूकेकी प्रमुख कार्यकारी तान्या स्टीलले थपिन्, “प्रविधि र संरक्षण सँगै आएपछि के सम्भव हुन्छ भन्ने हाम्रो सहकार्यले देखाएको छ। यस अभियानले साना व्यक्तिगत कामलाई विश्वव्यापी प्रभावमा रूपान्तरण गरेको छ, जसले युरोप र अफ्रिकामा वन्यजन्तु संरक्षण र समुदायलाई सहयोग गरेको छ। ग्राहकहरूको समर्थनका लागि धन्यवाद, जसले बाघ, कालो गैंडा र कछुवाजस्ता प्रजाति र तिनका बासस्थान जोगाउन सहयोग गरेको छ।”
यसै महिनाको सुरुमा भोडाफोनले लक्जेम्बर्गमा नयाँ युरोपेली लजिस्टिक्स हब सञ्चालनमा ल्याएको छ, जसले आपूर्ति सञ्जाल मजबुत बनाउने र युरोपभर नेटवर्क पूर्वाधार विस्तार तथा मर्मतमा सहयोग गर्नेछ। कम्पनीले यसले नेटवर्क विस्तारलाई छिटो बनाउने, आपूर्ति सञ्जाललाई मजबुत पार्ने र फाइभजी तथा फाइबर विस्तारलाई सहयोग गर्ने जनाएको छ।
प्रकाशित: १७ चैत्र २०८२, मंगलवार
