काठमाडौं ।
इन्स्टाग्रामले किशोर प्रयोगकर्ताका अभिभावकका लागि नयाँ सूचना प्रणाली सुरु गर्ने भएको छ। अब यदि कुनै किशोर प्रयोगकर्ताले छोटो समयभित्र आत्महत्या वा आत्म–क्षतिसम्बन्धी शब्दहरू बारम्बार खोजेमा अभिभावकलाई सचेत गराइनेछ।
उक्त सूचनामार्फत अभिभावकले आफ्ना सन्तानसँग यी विषयमा कसरी कुरा गर्ने भन्नेबारे सहयोगी सामग्री र स्रोतहरू पनि हेर्न सक्ने विकल्प पाउनेछन्। यो सुविधा आगामी साता अमेरिका, बेलायत, अष्ट्रेलिया र क्यानडामा अभिभावकीय निगरानी प्रयोगकर्ताका लागि सुरु गरिनेछ भने पछि अन्य देशहरूमा विस्तार गरिने कम्पनीले जनाएको छ।
इन्स्टाग्रामले आफ्नो ब्लग पोस्टमा लेखेको छ, “हामीले छोटो समय अवधिमा केही पटक खोजी गरिएको अवस्थामा मात्र सूचना जाने गरी सीमा तय गरेका छौं, तर सावधानी अपनाउने पक्षमा झुकेका छौं। कहिलेकाहीँ वास्तविक चिन्ताको कारण नहुँदा पनि अभिभावकलाई सूचना जान सक्छ, तर विज्ञहरूको सुझावअनुसार यही सुरुआती कदम उचित ठानेका छौं। हामी प्रतिक्रिया सुन्दै र निगरानी गर्दै यसलाई आवश्यक परे समायोजन गर्नेछौं।”
इन्ग्याजेटका अनुसार प्लेटफर्मले आत्महत्या र आत्म–क्षतिसम्बन्धी शब्द खोज्दा कम उमेरका किशोर प्रयोगकर्तालाई नतिजा देखाइँदैन र त्यस्ता सामग्री हालको नीतिअनुसार उनीहरूलाई देखाइँदैन भन्ने दोहोर्याएको छ।
साथै यस्तै प्रकारको अभिभावक सूचना सुविधा आफ्ना एआई उपकरणका लागि पनि विकास भइरहेको इन्स्टाग्रामले जनाएको छ, तर त्यससम्बन्धी विस्तृत जानकारी यसै वर्षको पछि मात्र सार्वजनिक हुने अपेक्षा गरिएको छ।
प्रकाशित: १६ फाल्गुन २०८२, शनिबार
