काठमाडौं ।
दक्षिण कोरियामा भएको डाटा चुहावटको प्रभावका कारण इ–कमर्स कम्पनी कुपाङ चौथो त्रैमासमा घाटामा गएको छ र विश्लेषकहरूको अनुमानभन्दा कम आम्दानी गरेको जनाएको छ।
न्युयोर्कमा सूचीकृत कुपाङले बिहीबार सार्वजनिक गरेको विवरणअनुसार अक्टोबर–डिसेम्बर अवधिमा कम्पनी २६ मिलियन डलर घाटामा गएको छ, जबकि अघिल्लो वर्ष यही अवधिमा नाफा कमाएको थियो। कम्पनीको आम्दानी ८.८ अर्ब डलर रहेको छ, जुन एलएसईजी स्मार्टइस्टिमेटले गरेको ८.९ अर्ब डलरको अनुमानभन्दा कम हो।
समूहको कुल आम्दानीको ९० प्रतिशतभन्दा बढी हिस्सा ओगट्ने कुपाङ कोरियाले नोभेम्बरमा करिब ३४ मिलियन ग्राहक समेटिएको डाटा चुहावटबारे खुलासा गरेपछि सार्वजनिक आलोचना सामना गर्दै आएको छ।
कम्पनीका प्रमुख वित्तीय अधिकृत गौरव आनन्दले आम्दानी सम्बन्धी छलफलका क्रममा उत्पादन वाणिज्य खण्डमा सक्रिय ग्राहक संख्या वार्षिक रूपमा ८ प्रतिशत बढेर चौथो त्रैमासमा २४.६ मिलियन पुगेको बताए। तर अघिल्लो त्रैमासको २४.७ मिलियनको तुलनामा यो संख्या घटेको देखिएको छ, जसलाई डाटा चुहावटसँग सम्बन्धित मानिएको छ।
“चौथो त्रैमासको अन्त्यपछि अवस्था स्थिर हुँदै गएको देखिन्छ। धेरै ग्राहकले पुनः आफ्नो खाता सक्रिय गरिरहेका छन् र ग्राहक वृद्धिको प्रवृत्ति सुधारिँदै गएको छ,” आनन्दले भने।
उनका अनुसार उत्पादन वाणिज्य खण्डमा स्थिर विनिमय दरमा गणना गरिएको वृद्धि दर जनवरीमा करिब ४ प्रतिशतसम्म झरेर सबैभन्दा कम स्तरमा पुगेको थियो, तर फेब्रुअरीमा सुधारको संकेत देखिएको छ। पहिलो त्रैमासका लागि कुपाङले ५ देखि १० प्रतिशतसम्म स्थिर विनिमय दरमा आम्दानी वृद्धि हुने अपेक्षा गरेको छ।
आनन्दले आगामी केही महिनासम्म वृद्धि र नाफामा दबाब कायम रहने बताए, जसको कारण डाटा चुहावटको प्रभाव अझै बाँकी रहनु हो। तर वर्षभरि क्रमशः यसको असर घट्दै जाने उनको भनाइ छ।
कम्पनीले डाटा चुहावटका क्रममा प्रयोगकर्ताको नाम, फोन नम्बर र डेलिभरी ठेगाना सार्वजनिक भएको तर भुक्तानी विवरण वा लगइन विवरण सुरक्षित रहेको जनाएको छ। कम्पनीले भविष्यमा यस्ता घटना दोहोरिन नदिन सुरक्षा प्रणाली अझ कडा बनाउने प्रतिबद्धता व्यक्त गरेको रोयटर्सले उल्लेख गरेको छ।
कुपाङको दक्षिण कोरियाली व्यवसायका कार्यवाहक प्रमुख हेरोल्ड रोजर्सले घटनासँग सम्बन्धित ग्राहक डाटाको दुरुपयोग भएको प्रमाण हालसम्म फेला नपरेको बताएका छन्। उनका अनुसार यो घटना एक पूर्व कर्मचारीले कम्पनीको प्रणालीसम्बन्धी आन्तरिक जानकारी प्रयोग गरेर लक्षित आक्रमण गरेको कारण भएको हो, जसलाई एक साइबर सुरक्षा कम्पनीको अनुसन्धानले पुष्टि गरेको छ।
तर दक्षिण कोरियाको विज्ञान मन्त्रालयले यस महिना उक्त घटना जटिल साइबर आक्रमण नभई व्यवस्थापन कमजोरीका कारण भएको जनाएको छ। घटनापछि प्रतिस्पर्धी कम्पनीहरूले ग्राहक तान्ने प्रयास तीव्र बनाएका छन्। साथै, अति–छिटो रातारात डेलिभरी सेवामा प्रतिस्पर्धा बढाउन सक्ने प्रस्तावित नियामक परिवर्तनले पनि कुपाङलाई दबाबमा पारेको छ।
यसैबीच, दक्षिण कोरियाको प्रतिस्पर्धा नियामक निकायले आपूर्तिकर्तामाथि मूल्य घटाउन दबाब दिएको र भुक्तानी ढिलाइ गरेको भन्दै कुपाङलाई २.२ अर्ब वन (करिब १५.३ लाख डलर) जरिवाना गरेको छ। यो जरिवाना डाटा चुहावट घटनासँग सम्बन्धित भने होइन।
प्रकाशित: १६ फाल्गुन २०८२, शनिबार
