काठमाडौं ।
पूर्व ट्विटर इन्जिनियरहरूले स्थापना गरेको एआई समाचार एप पार्टिकलले अब वेबमा प्रकाशित समाचारसँगै पोडकास्टमा आएका महत्वपूर्ण अंश पनि समेट्न थालेको छ।
एन्ड्रोइड संस्करण सार्वजनिक हुनुअघि एपले “पोडकास्ट क्लिप्स” नामक नयाँ फिचर सुरु गरेको हो। यसले विभिन्न प्रकारका पोडकास्टबाट सबैभन्दा रोचक र सम्बन्धित अंश पहिचान गरी सम्बन्धित समाचार कथासँगै फिडमा देखाउँछ।
यसको अर्थ, लामो पोडकास्ट सुनेर ४५ सेकेन्डको महत्वपूर्ण टिप्पणी खोज्नु नपरी, प्रयोगकर्ताले समाचार पढ्दै गर्दा त्यही अंश सिधै प्ले गर्न सक्छन्। चाहेको खण्डमा सो क्लिपको ट्रान्सक्रिप्ट पनि पढ्न सकिन्छ, जसमा बोलिएका शब्दहरू हाइलाइट हुँदै जान्छन्।
टेकक्रञ्चका अनुसार यसअघि ट्विटरमा प्रोडक्ट म्यानेजमेन्टकी वरिष्ठ निर्देशकका रुपमा काम गरेकी पार्टिकलकी सीईओ सारा बेकपोरका अनुसार कुनै समाचारसँग सम्बन्धित पोडकास्ट सामग्री भएमा एपले ती सबै क्लिप समेट्ने प्रयास गर्छ। उनका अनुसार यसले समाचार पढ्दै गर्दा त्यस विषयमा भइरहेका टिप्पणी र बहस बुझ्न सजिलो बनाउँछ।
यो सुविधा समाचार पारिस्थितिकी तन्त्रमा आएको परिवर्तनको संकेत पनि हो। पछिल्ला वर्षहरूमा धेरै मानिसले पोडकास्टबाट समाचार लिन थालेका छन् र तिनलाई विश्वसनीय स्रोतका रूपमा हेर्न थालेका छन्।
साथै सार्वजनिक व्यक्तित्वहरूले महत्वपूर्ण घोषणा र धारणा सार्वजनिक गर्न पोडकास्टलाई माध्यम बनाउने प्रवृत्ति पनि बढेको छ।
२०२४ मा ब्लूमबर्गले जनाएअनुसार विशेषगरी प्रविधि कम्पनीका सीईओहरूले परम्परागत सञ्चारमाध्यमभन्दा आफूलाई अनुकूल पोडकास्ट होस्टमार्फत आफ्ना धारणा सार्वजनिक गर्ने चलन बढेको छ।
बेकपोरका अनुसार पार्टिकलले एम्बेडिङ मोडेल प्रयोग गरी कुन पोडकास्ट अंश कुन समाचारसँग सम्बन्धित छ भनेर पहिचान गर्छ। यी मोडेलहरू ठूलो भाषा मोडेल (एलएलएम) उपलब्ध गराउने कम्पनीहरूले नै उपलब्ध गराए पनि ती जेनेरेटिभ एआई प्रविधि भने होइनन्।
उनले भेक्टर एम्बेडिङमार्फत पोडकास्टका विभिन्न अंश र समाचार कथाबीचको सम्बन्ध बुझ्ने गरिएको बताइन्। एउटा पोडकास्टमा १० देखि २० वटासम्म फरक–फरक समाचार विषय समेटिन सक्ने भएकाले एआईले कुन अंश कहाँबाट सुरु र कहाँ अन्त्य गर्ने भन्ने निर्धारण पनि गर्ने गरेको उनले स्पष्ट पारिन्।
प्रकाशित: १३ फाल्गुन २०८२, बुधबार
