काठमाडौं ।
सामसङले भर्खरै कम्पनीले भविष्यको सिक्सजी नेटवर्कको प्रमुख मानिने महत्त्वपूर्ण प्रविधिको परीक्षण सफलतापूर्वक पूरा गरेको घोषणा गरेको छ। सामसङ स्मार्टफोन मात्र नभई दूरसञ्चार नेटवर्किङ उपकरणहरूको अनुसन्धान र विकासमा पनि संलग्न रहेको छ।
सामसङले केटी कर्पोरेशनसँग साझेदारी गरेको छ र ७गीगाहर्ज ब्यान्डमा एक्स्ट्रिम मल्टिपल–इनपुट मल्टिपल–आउटपुट (एक्स–एमआईएमओ) प्रविधिको परीक्षण पूरा गरेको छ। तिनीहरूले अल्ट्रा–हाई–डेन्सिटी एन्टेना प्रणाली प्रयोग गरेर ३जीबीपीएसको पिक डाउनलोड गति हासिल गरेका छन्। उक्त प्रणालीले उपकरणको भौतिक आकार नबढाई चार गुणा एन्टेनाहरू समावेश गर्दछ। यसको आकार लगभग अघिल्लो पुस्ताको जस्तै भएको जीएसएमएरिनाले रिपोर्ट गरेको छ।
७गीगाहर्ज ब्यान्डलाई अहिले सिक्सजी नेटवर्कहरूको लागि उत्तम समाधान मानिने गरिएको हुनाले एक्स–एमआईएमओ लाई सिक्सजी नेटवर्कको स्तम्भ भनिने गरिएको छ। यसले अझै पनि मिलिमिटर वेभ ब्यान्डमा क्षमता र कभरेज बीच राम्रो सन्तुलन कायम राख्दछ।
अनुसन्धानकर्ताहरूले रियल–वर्ल्ड, आउटडोर कन्डिसन (अवस्था)हरूको नक्कल गर्ने केटीको विशेषज्ञता प्रयोग गरेर बेस (आधार) स्टेशनबाट युजर डिभाइस (प्रयोगकर्ता उपकरण)मा आठ डाटा स्ट्रिमहरू स्ट्रिम गरेको रिपोर्ट गरिएको छ।
सिक्सजीको कुरा गर्दा यो प्रविधिले अझै धेरै लामो बाटो तय गर्न बाँकी छ। तर सामसङ स्पष्ट रूपमा अर्को पुस्ताको मोबाइल नेटवर्कको विकासमा अग्रगामी बन्ने सही बाटोमा रहेको छ।
प्रकाशित: ११ फाल्गुन २०८२, सोमबार
