काठमाडौं ।
क्रू-१२ का अन्तरिक्षयात्रीहरू चाँडै अन्तर्राष्ट्रिय अन्तरिक्ष स्टेशन (आईएसएस) तर्फ प्रस्थान गर्ने तयारीमा छन्। अघिल्लो मिशन एक सदस्यको स्वास्थ्यसम्बन्धी चिन्ताका कारण समयभन्दा अगावै समाप्त भएपछि हाल स्टेशनमा बाँकी रहेका तीन अन्तरिक्षयात्रीसँग उनीहरू जोडिनेछन्।
नासाले यस मिशनका लागि सुरुमा फेब्रुअरी १५ मा प्रक्षेपण गर्ने योजना बनाएको थियो, तर उक्त मिति अघि सार्दै फेब्रुअरी ११ मा तय गरेको छ। अब फ्लोरिडाको केप क्यानाभेरलबाट बिहान ६:०१ (पूर्वी समय) भन्दा पहिले नहुने गरी प्रक्षेपण गर्ने लक्ष्य राखिएको नासाले जनाएको छ।
इन्ग्याजेटका अनुसार क्रू सदस्यहरू अहिले क्वारेन्टिनमा छन्। यदि प्रक्षेपणको दिन सबै कुरा योजनाअनुसार अघि बढेमा उनीहरू सवार ड्र्यागन क्याप्सुल फेब्रुअरी १२ को बिहान करिब १०:३० बजे कक्षीय प्रयोगशालासँग डक हुने अपेक्षा गरिएको छ।
नासाले क्रू-११का सदस्यहरूलाई जनवरी १५ मा पृथ्वी फर्काउने निर्णय गरेको थियो। उक्त निर्णय एक सदस्यको स्वास्थ्य अवस्थाबारे थप परीक्षण गर्न आईएसएस मा आवश्यक उपकरण नहुनु मुख्य कारण रहेको नासाले बताएको थियो। प्रभावित अन्तरिक्षयात्री स्थिर अवस्थामा भए पनि सावधानी अपनाउँदै सबै चार सदस्यलाई पृथ्वी फर्काइएको थियो।
यसपछि अन्तरिक्ष स्टेशनको जिम्मेवारी केवल तीन जनाको काँधमा रह्यो—नासाका अन्तरिक्षयात्री क्रिस विलियम्स र रुसी पक्षका दुई कोस्मोनट। अब उनीहरूसँग क्रू-१२ का नासाका अन्तरिक्षयात्री जेसिका मेयर र ज्याक ह्याथवे, युरोपेली अन्तरिक्ष एजेन्सी (ईएसए) की सोफी एडेनो तथा रोस्कोसमोसका कोस्मोनट आन्द्रेइ फेद्याएभ पनि जोडिनेछन्।
यसैबीच स्पेसएक्सको फाल्कन ९ रकेटको माथिल्लो चरणमा समस्या देखिएपछि केही दिनका लागि उडानहरू रोकिएका थिए जसले क्रू-१२ को तालिका अनिश्चित बनाएको थियो। तर फेब्रुअरी ६ मा संघीय उड्डयन प्रशासन (एफएए) ले अर्को उडानका लागि स्वीकृति दिएको छ।
नासाले मिशनको प्रिलन्च, प्रक्षेपण र डकिङ गतिविधिहरू नासा प्लस, अमेजन प्राइम र आफ्नो यूट्युब च्यानलमार्फत प्रत्यक्ष प्रसारण गर्नेछ। प्रक्षेपणसम्बन्धी प्रत्यक्ष प्रसारण फेब्रुअरी ११ को बिहान ४ बजे (पूर्वी समय) देखि सुरु हुनेछ।
प्रकाशित: २६ माघ २०८२, सोमबार
