काठमाडौं ।
मेटा प्लेटफर्म्सले आफ्ना सबै एपहरूमा किशोर प्रयोगकर्तालाई उपलब्ध गराइएका एआई क्यारेक्टरहरूमा पहुँच विश्वव्यापी रूपमा रोक्ने निर्णय गरेको छ। कम्पनीले किशोर प्रयोगकर्ताका लागि परिमार्जित र सुरक्षित संस्करण तयार पार्ने क्रममा हालका एआई क्यारेक्टरहरू अस्थायी रूपमा निलम्बन गर्न लागेको जनाएको छ।
कम्पनीले बालबालिका र किशोर सुरक्षासम्बन्धी अद्यावधिक ब्लग पोस्टमार्फत “आगामी केही हप्ताभित्र किशोर प्रयोगकर्ताले हाम्रो कुनै पनि एपमा एआई क्यारेक्टरहरूमा पहुँच पाउने छैनन्, जबसम्म नयाँ अनुभव तयार हुँदैन,” मेटाले शुक्रबार जनाएको छ।
गत अक्टोबरमा मेटाले अभिभावकलाई आफ्ना किशोर सन्तानका एआई क्यारेक्टरसँग हुने निजी च्याटहरू बन्द गर्न सकिने अभिभावकीय नियन्त्रणको पूर्वावलोकन प्रस्तुत गरेको थियो। सामाजिक सञ्जालमा प्रयोग भइरहेको ‘फ्लर्टी’ च्याटबोटहरूको व्यवहारप्रति कडा आलोचना भएपछि नाबालिग प्रयोगकर्ताको सुरक्षाका लागि यो कदम चालिएको हो।
यद्यपि मेटाले शुक्रबार ती अभिभावकीय नियन्त्रणहरू अहिलेसम्म औपचारिक रूपमा सार्वजनिक नगरिएको पनि स्पष्ट पारेको छ। यसअघि मेटाले किशोर प्रयोगकर्ताका लागि तयार गरिने एआई अनुभवहरूलाई पीजी-१३ चलचित्र रेटिङ प्रणालीअनुसार मार्गदर्शन गरिने बताएको थियो। यसमार्फत नाबालिगहरूलाई अनुपयुक्त सामग्रीमा पहुँच हुन नदिन प्रयास गरिने कम्पनीको भनाइ छ।
यसबीच अमेरिकाका नियामक निकायहरूले च्याटबोटका सम्भावित नकारात्मक प्रभावबारे एआई कम्पनीहरूमाथि निगरानी कडा बनाउँदै लगेका छन्। गत अगस्टमा रोयटर्सले मेटाका एआई नियमहरूले नाबालिगसँग उत्तेजक तथा आपत्तिजनक संवादलाई अनुमति दिएको विषयमा रिपोर्ट प्रकाशित गरेको थियो।
प्रकाशित: ११ माघ २०८२, आईतवार
