काठमाडौं ।
चीनले चिप निर्माता नेक्सपेरिया सम्बन्धी निर्णयलाई लिएर बुधबार कडा आलोचना गर्दै आफ्ना “गल्तीहरू” तत्काल सच्याउन आग्रह गरेको छ। साथै, विश्वव्यापी सेमिकन्डक्टर उत्पादन तथा आपूर्ति शृंखलाको स्थायित्व सुनिश्चित गर्न अवरोधहरू हटाउनुपर्ने चीनको भनाइ छ।
सेप्टेम्बरमा नेदरल्याण्ड्स सरकारले चिनियाँ कम्पनी विंगटेकको स्वामित्वमा रहेको डच चिप निर्माता नेक्सपेरियाको नियन्त्रण आफ्नो हातमा लिएको थियो। कम्पनीका संस्थापकले प्रविधि र उत्पादन चीनतर्फ सार्न सक्ने आशंकाका कारण यस्तो कदम चालिएको नेदरल्याण्ड्सको दाबी थियो। यसको प्रतिशोधस्वरूप चीनले नेक्सपेरियाले उत्पादन गर्ने चिपहरूको निर्यात रोक लगाएको थियो। ती चिपहरू मुख्यतः गाडी तथा उपभोक्ता इलेक्ट्रोनिक्समा प्रयोग हुने गर्छन् र तिनको अधिकांश प्याकेजिङ चीनमै हुने गर्दछ।
रोयटर्सका अनुसार चीनको वाणिज्य मन्त्रालयले जारी गरेको विज्ञप्तिमा नेदरल्याण्ड्सलाई एकपक्षीय रूपमा नचल्न आग्रह गर्दै भनिएको छ, “चीनले फेरि एकपटक नेदरल्याण्ड्सलाई आफ्ना गल्तीहरू तुरुन्त सुधार गर्न र विश्व सेमिकन्डक्टर आपूर्ति शृंखलाको स्थायित्व र सुरक्षालाई पुनःस्थापित गर्न बाधा हटाउन आग्रह गर्दछ।” यस विषयमा नेदरल्याण्ड्स सरकारबाट बुधबार बिहानसम्म कुनै आधिकारिक प्रतिक्रिया आएको थिएन।
नोभेम्बरमा भने नेदरल्याण्ड्स सरकारले चीनसँग वार्ता जारी रहँदा सद्भावनाको संकेतस्वरूप नेक्सपेरियामाथिको आफ्नो हस्तक्षेप अस्थायी रूपमा निलम्बन गरेको थियो। यसपछि विंगटेकले अदालतद्वारा नियुक्त संरक्षकहरूसँग नेदरल्याण्ड्सस्थित नेक्सपेरियाको नियन्त्रणसम्बन्धी छलफल सुरु गरेको छ। यद्यपि, नेदरल्याण्ड्सका आर्थिक मामिला मन्त्री भिन्सेन्ट कारेमान्सले नेक्सपेरियामा हस्तक्षेप गर्ने आफ्नो निर्णयको बचाउ गर्दै आएका छन्।
डच पत्रिका डे टेलेग्राफलाई दिएको हालैको अन्तर्वार्तामा उनले भने, “यो रमाइलो निर्णय थिएन, तर आवश्यक थियो। म मेरा निर्णयहरू रमाइलो लाग्छ कि लाग्दैन भन्ने आधारमा गर्दिनँ।”
चीनको वाणिज्य मन्त्रालयले नेदरल्याण्ड्सको उक्त अडानलाई “अवाक पार्ने” भन्दै आलोचना गरेको छ। मन्त्रालयको भनाइ छ, “नेदरल्याण्ड्सले नेक्सपेरियाको आन्तरिक मामिलामा गरेको अनुचित प्रशासनिक हस्तक्षेपले विश्व सेमिकन्डक्टर आपूर्ति शृंखलामा संकट पैदा गरेको छ, जसको पूर्ण जिम्मेवारी नेदरल्याण्ड्सले लिनुपर्छ।”
प्रकाशित: १८ पुष २०८२, शुक्रबार
