बेलायतले २०२७ अक्टोबरदेखि क्रिप्टोएसेट नियमन सुरु गर्ने

काठमाडौं ।

बेलायतले २०२७ अक्टोबरदेखि क्रिप्टोएसेट नियमन सुरु गर्ने भएको छ। अर्थ मन्त्रालयले सोमबार यो जानकारी दिएको हो। उद्योगलाई स्पष्टता प्रदान गर्दै “शंकास्पद पात्रहरू” लाई बजारबाट बाहिर राख्ने उद्देश्यका साथ नयाँ नियम ल्याउन लागिएको मन्त्रालयले जनाएको छ।

सरकारले सोमबार नै संसदमा सम्बन्धित विधेयक दर्ता गर्ने तयारी गरेको छ। नयाँ कानुनले क्रिप्टोसँग सम्बन्धित कम्पनीहरूलाई हालको वित्तीय नियमनको दायरामा ल्याउनेछ, जसले बेलायतलाई युरोपेली संघभन्दा अमेरिकासँग बढी नीतिगत रूपमा नजिक बनाउनेछ। युरोपेली संघले भने यस उद्योगका लागि छुट्टै नियमहरूको ढाँचा तयार गरिसकेको छ।

मन्त्रालयका एक प्रवक्ताका अनुसार नियमन कार्यान्वयनका लागि तयार गरिएको मस्यौदा विधेयकमा यस वर्षको सुरुमा सार्वजनिक गरिएपछि केवल साना परिवर्तन मात्र गरिएका छन्।

विश्वव्यापी रूपमा क्रिप्टोएसेटप्रतिको चासो अमेरिकी राष्ट्रपति डोनाल्ड ट्रम्प उद्योगलाई समर्थन गर्ने वाचा गर्दै सत्तामा आएपछि बढेको छ। यद्यपि सबैभन्दा ठूलो क्रिप्टोकरेन्सी बिटकोइनको मूल्य रेकर्ड उच्च स्तर छोएपछि हालका महिनाहरूमा तीव्र रूपमा घटेको छ।

उद्योगका दृष्टिमा अमेरिका बेलायतभन्दा बढी क्रिप्टो–मैत्री नीतितर्फ अघि बढिरहेको छ, जबकि युरोपेली संघको मार्केट इन क्रिप्टोएसेट्स नियम २०२४ मै लागू भइसकेको छ। बेलायतले डिजिटल एसेटसम्बन्धी उपयुक्त दृष्टिकोण तय गर्न अमेरिकासँग “ट्रान्सएटलान्टिक टास्कफोर्स” मार्फत सहकार्य गर्ने बताएको छ।

अर्थमन्त्री रेचल रिभ्सले यी नियमहरूले “बजारका लागि स्पष्ट मार्गनिर्देशन” दिने, उपभोक्ता संरक्षण मजबुत बनाउने र “शंकास्पद पात्रहरू” लाई बाहिर राख्ने बताएकी छन्। ट्रेभर्स स्मिथकी साझेदार न्याटली लुइसले रोयटर्ससँग कुरा गर्दै अन्तिम विधेयकमा गरिने परिवर्तनहरू “साना मात्र नभएर सार्थक” हुने आशा व्यक्त गरिन्। उनका अनुसार प्रारम्भिक मस्यौदामा “धेरै प्राविधिक कानुनी समस्याहरू” थिए।

यसैबीच, बेलायतको क्रिप्टो नियामक संरचना क्रमशः स्पष्ट हुँदै गएको छ। आर्थिक आचरण नियामकले व्यापार तथा बजार दुरुपयोग, कस्टडी र इश्यूसम्बन्धी छुट्टै नियमहरू तयार गरिरहेको छ भने ब्याङ्क अफ इङ्ल्याण्डले गत महिना दैनिक भुक्तानीका लागि प्रयोग हुने स्टेबलकोइन नियमनसम्बन्धी प्रस्ताव सार्वजनिक गरेको थियो।

तर नियामक निकायहरूले जोखिमबारे चेतावनी दिन भने जारी राखेका छन्। उनीहरूका अनुसार क्रिप्टोकरेन्सीमा लगानी गर्नेहरूले आफ्नो सम्पूर्ण रकम गुम्न सक्ने सम्भावनाका लागि तयार रहनुपर्छ।