इन्टेलको एआईसम्बन्धी जिम्मेवारी अब सीईओ टानले सम्हाल्ने

काठमाडौं ।

इन्टेलले सोमबार जनाए अनुसार कम्पनीका प्रमुख कार्यकारी अधिकृत लिप-बु ट्यानले अब कम्पनीका कृत्रिम बुद्धिमत्ता (एआई) सम्बन्धी कार्यहरू सम्हाल्ने छन्।

कम्पनीका प्रविधि प्रमुख (सीटीओ) च्याटजीपीटी निर्माता ओपनएआईमा गएपछि पद रिक्त भएको हो। जनवरीमा भएको व्यवस्थापकीय पुनर्संरचनापछि इन्टेलको एआई प्रयासको नेतृत्व गर्दै आएका सचिन कट्टीले सामाजिक सञ्जाल ‘एक्स’ मार्फत आफू ओपनएआईमा सामेल भएको जानकारी दिएका छन्।

“हामी सचिनका योगदानका लागि धन्यवाद दिन्छौं र उनको आगामी यात्राका लागि शुभकामना व्यक्त गर्छौं। लिप-बुले एआई तथा एड्भान्स्ड टेक्नोलोजी समूहको नेतृत्व गर्नेछन् र टोलीसँग नजिकबाट काम गर्नेछन्,” इन्टेलले विज्ञप्तिमा जनाएको छ।

“एआई इन्टेलको सबैभन्दा उच्च रणनीतिक प्राथमिकतामध्ये एक हो र हामी नयाँ एआई कार्यभारअनुसार आफ्नो प्रविधि तथा उत्पादन योजनालाई सफलतापूर्वक कार्यान्वयन गर्न केन्द्रित छौं,” कम्पनीले थपेको छ।

ओपनएआईका अध्यक्ष ग्रेग ब्रक्म्यानले ‘एक्स’ मा कट्टीले कम्पनीको कम्प्युट इन्फ्रास्ट्रक्चरको डिजाइन तथा निर्माण कार्य गर्ने लेखेका छन्। जसले सामान्य कृत्रिम बुद्धिमत्ता (एजीआई) अनुसन्धानलाई शक्ति प्रदान गर्नेछ र यसको प्रयोग सबैका फाइदाका लागि विस्तार गर्नेछ।

यसबारे ओपनएआईले तत्काल कुनै टिप्पणी गरेको छैन।

लिप-बु ट्यानले मार्चमा इन्टेलको नेतृत्व सम्हालेपछि कम्पनीका धेरै शीर्ष कार्यकारीहरूले पदत्याग गरेका छन्। कम्पनीले आफ्नो फाउन्ड्री (ठेक्का उत्पादन व्यवसाय)का लागि ठूला ग्राहक आकर्षित गर्न संघर्ष गरिरहेको छ। इन्टेलका केन्द्रीय प्रोसेसरहरू एआई सर्भर प्रणालीमा प्रयोग भए पनि, कम्पनीले एनभिडियाले डिजाइन गरेको र ताइवानको टीएसएमसीले उत्पादन गरेको सिलिकन चिपसँग प्रतिस्पर्धा गर्नसक्ने डाटा सेन्टर एआई चिप विकास गर्न कठिनाइ भोगिरहेको छ।

रोयटर्सका अनुसार कट्टी करिब चार वर्षअघि इन्टेलमा सामेल भएका थिए र नेटवर्किङ समूहमा काम गरेका थिए, जसको नेतृत्व उनले पूर्व सीईओ प्याट गेलसिङरको कार्यकालमा गरेका थिए। ट्यानले कम्पनीको नेतृत्व संरचना सरल बनाउने क्रममा गत अप्रिलमा कट्टीलाई प्रविधि प्रमुख तथा एआई प्रमुखको रूपमा पदोन्नति दिएका थिए।

कट्टी यसअघि करिब १५ वर्षसम्म स्ट्यानफोर्ड विश्वविद्यालयमा प्राध्यापक थिए।

ट्यानले केही कार्यकारीहरूलाई बढुवा गर्दै जिम्मेवारी विस्तार गरेका छन्। उत्पादन सहायक कम्पनी सञ्चालन गरिरहेका नागा चन्द्रशेखरनलाई अब बाह्य ठेक्का उत्पादन ग्राहकहरूसँग काम गर्ने जिम्मेवारी पनि दिइएको छ। ट्यानले कम्पनी बाहिरबाट नयाँ कार्यकारीहरू पनि भित्र्याएका छन्, जसअन्तर्गत पूर्व आर्म कार्यकारी केभोर्क केचिचियनलाई कम्पनीको डाटा सेन्टर इकाइको प्रमुख नियुक्त गरिएको छ।