काठमाडौं ।
चन्द्र अवतरण यान निर्माण गर्ने कम्पनी इन्ट्युटिभ मेशिन्स ले मंगलबार ८०० मिलियन डलरको सम्झौतामा ल्यानेरिस स्पेस सिस्टम्स (किन्न लागेको जनाएको छ।
ल्यानेरिसलाई पहिले म्याक्सार स्पेस सिस्टम्स भनेर चिनिन्थ्यो र हाल निजी इक्विटी कम्पनी एडभेन्ट इन्टरनेशनल को स्वामित्वमा रहेको थियो।
यो कदमसँगै इन्ट्युटिभ मेशिन्सले आफ्नो चन्द्र मिशन केन्द्रित कारोबारलाई विस्तार गर्दै सरकारी र निजी ग्राहकहरूका लागि अन्तरिक्ष यान डिजाइन, निर्माण र सञ्चालन गर्ने पूर्ण सेवा दिने कम्पनी बन्ने लक्ष्य लिएको छ।
रोयटर्सका अनुसार सम्झौतामा ४५० मिलियन डलर नगद र ३५० मिलियन डलर मूल्यका सेयर समावेश छन्। नियामक स्वीकृतिपछि यो कारोबार आगामी वर्षको पहिलो त्रैमासिकमा पूरा हुने अपेक्षा गरिएको छ। कम्पनीको सेयर मूल्य प्रि–मार्केट कारोबारमा करिब ५ प्रतिशतले घटेको छ।
सीईओ स्टिभ आल्टेमसले भने, “यो सम्झौताले इन्ट्युटिभ मेशिन्सलाई चन्द्रमाबाट बाहिर ल्याएर फराकिलो अन्तरिक्ष परियोजनातर्फ अघि बढाउँछ।” संयुक्त कम्पनीले वार्षिक ८५० मिलियन डलरभन्दा बढी राजस्व आर्जन गर्ने र सेप्टेम्बर ३० सम्ममा ९२० मिलियन डलर बराबरका भविष्यका सम्झौता सुरक्षित गर्ने अनुमान गरिएको छ।
ल्यानेरिसले रक्षा, सञ्चार र वैज्ञानिक मिशनका लागि प्रयोग हुने उपग्रह र अन्तरिक्ष यान निर्माण गर्छ। एडभेन्टले संयुक्त कम्पनीमा कति हिस्सा राख्ने हो भन्ने खुलाइएको छैन। ल्यानेरिस स्पेस सिस्टम्स म्याक्सार टेक्नोलोजीजको उपग्रह निर्माण शाखा थियो, जसलाई एडभेन्टले सन् २०२३ मा करिब ४ अर्ब डलरमा निजी स्वामित्वमा लिएको थियो।
यस अधिग्रहणअघि इन्ट्युटिभ मेशिन्सले गहिरो अन्तरिक्ष नेभिगेसन कम्पनी किनेटएक्स र अमेरिकी सरकारका विभिन्न सम्झौता प्राप्त गरेको थियो।
अर्कोतर्फ, कम्पनीले तेस्रो त्रैमासिकमा ५२.४ मिलियन डलर राजस्व आर्जन गरेको जनाएको छ, जुन विश्लेषकहरूको ६८.१ मिलियन डलरको अनुमानभन्दा कम हो।
कम्पनीले १० मिलियन डलर घाटा बेहोरेको छ भने नासाको र अमेरिकी वायुसेनासँगका परियोजनाहरू जारी रहँदा २३५.९ मिलियन डलरको काम बाँकी रहेको जनाएको छ।
प्रकाशित: १९ कार्तिक २०८२, बुधबार
