इम्बार्क कलेजले शुरु गर्यो स्टार्टअप क्षमता विकास कार्यक्रम

काठमाडौं ।

इम्बार्क कलेजमा ‘अप्रेन्टिससिप कार्यक्रम’ र ‘स्टार्टअप क्षमता विकास कार्यक्रम’को शुभारम्भ गरिएको छ। इम्बार्क कलेजले नेपालमा व्यवसायिक शिक्षा र रोजगारीको खाडललाई हटाउँदै “व्यावहारिक सीप तालिम (अप्रेन्टिससिप) कार्यक्रम” र “नवप्रवर्तन (स्टार्टअप) क्षमता विकास कार्यक्रम” गरी दुईओटा कार्यक्रमको घोषणा गरेको छ।

यी कार्यक्रमहरू नेपालका भविष्यका व्यवसायिक नेतृत्वहरू विकास गर्न, रोजगारी सुनिश्चित गर्न र उद्यमशीलता प्रवर्द्धन गर्न लक्षित रहेका छन्।

इम्बार्क कलेजका कार्यकारी निर्देशक तथा सीईओ आशिष ठाकुरले यो कार्यक्रमले स्नातकहरुले शैक्षिक जीवनपछि व्यावसायिक जीवनमा प्रवेश गर्दा हुने अनिश्चिततालाई अन्त्य गर्ने बताए। ‘हामीले व्यावसायिक शिक्षालाई प्रत्यक्ष उद्योगसँग जोडेर नेपालमा करियर– रेडी शिक्षाको नयाँ मापदण्ड स्थापित गरेका छौं”, उनले भने।

यस अप्रेन्टिससिप कार्यक्रमले नेपालका प्रमुख तथा नवीन उद्योग र उद्यमहरूसँगको साझेदारी मार्फत योग्य स्नातकहरूलाई रोजगारी सुनिश्चित गर्ने बताइएको छ। सहभागी कम्पनीहरूले संरचित तालिम आवश्यकताको मूल्याङ्कन (टीएनए) अनुसार रोजगारीको अवसर प्रदान गरिने थप उल्लेख गरिएको छ।

कार्यक्रमका विशेषताहरूमा पूर्वनियोजित संरचना, व्यावसायिक परामर्श, नियमित मूल्याङ्कन र दीर्घकालीन साझेदारी सम्झौता समावेश छन् जसले उद्योगलाई दक्ष जनशक्ति र विद्यार्थीलाई सुनिश्चित करियर मार्गदर्शन दिने जनाइएको छ।

इम्बार्क कलेजले सुरु गरेको स्टार्टअप क्षमता विकास कार्यक्रमले कानुनी रूपमा दर्ता भई १० वर्षभन्दा कम समय सञ्चालन भएका तथा वार्षिक कारोबार १५ करोड भन्दा कम भएका नवप्रवर्तन व्यवसायहरुलाई लक्षित गरेको छ।

यस कार्यक्रमले नेपाल सरकारको राष्ट्रिय स्टार्टअप नीति २०८० र औद्योगिक उद्यम ऐन २०७६ सँग मेल खाने गरी नवप्रवर्तनशील व्यवसायहरूलाई सहयोग प्रदान गर्दछ।

त्यसैगरी प्राथमिकता दिइने व्यवसायहरूमा मापनयोग्यता र बजार प्रभाव भएका स्टार्ट अपहरू पर्छन्।

“नेपालमा उदयमशीलताको सम्भावना अपार छ, तर रणनीतिक स्रोतहरू सम्मको पहुँच सीमित छ। हाम्रो कार्यक्रमले नवप्रवर्तनलाई दीगो व्यवसायमा रूपान्तरण गर्न समय क्षमता विकासमा जोड दिन्छ”, सीईओ ठाकुरले भने।

यी दुई कार्यक्रमहरूले नेपाल सरकारको नीतिअनुरूप समृद्ध उद्यमशील पारिस्थितिक तन्त्र निर्माणमा टेवा पुर्याउने अपेक्षा गरिएको कलेजको दावी छ।