मेटाद्वारा एआई फोटो र भिडियो प्रविधिका लागि मिडजर्नीसँग लाइसेन्स सम्झौता

काठमाडौं ।

मेटा अब एआई फोटो र भिडियो प्रविधि क्षेत्रमा नयाँ साझेदारी गर्दैछ। मेटाका मुख्य एआई अधिकृत एलेक्जेन्डर वाङले शुक्रबार थ्रेड्समा जानकारी दिँदै मिडजर्नीसँगको लाइसेन्स सम्झौताबारे घोषणा गरेका हुन्।

उनका अनुसार मेटाका अनुसन्धान टोलीहरूले मिडजर्नीसँग सहकार्य गर्दै भविष्यका एआई मोडल र उत्पादनमा यसको प्रविधि प्रयोग गर्नेछन्। “सर्वश्रेष्ठ उत्पादन दिन मेटाले सबै दिशामा प्रयास गर्नुपर्छ,” वाङले भने। “यसको अर्थ उच्चस्तरीय प्रतिभा, महत्वाकांक्षी कम्प्युट रोडम्याप र उद्योगका उत्कृष्ट कम्पनीहरूसँग सहकार्य हो।”

यो साझेदारीले मेटालाई ओपनएआईको सोरा, ब्ल्याक फरेस्ट ल्याब्सको फ्लक्स र गुगलको भिओजस्ता अग्रणी एआई मोडलसँग प्रतिस्पर्धा गर्न सहयोग गर्न सक्ने अनुमान गरिएको छ।

टेकक्रञ्चका अनुसार मेटाले गत वर्ष आफ्नै एआई इमेज जेनरेसन टुल ‘इम्याजिन’ फेसबुक, इन्स्टाग्राम र मेसेन्जरमा प्रयोगमा ल्याएको थियो। कम्पनीसँग ‘मुभी जेन’ नामक भिडियो जेनरेसन टुल पनि छ, जसले प्रयोगकर्तालाई प्रम्प्टमार्फत भिडियो बनाउन मद्दत गर्छ।

मिडजर्नीसँगको सम्झौता मेटाको एआई दौडमा अर्को ठूलो कदम मानिएको छ। यसअघि सीईओ मार्क जुकरबर्गले एआई अनुसन्धानकर्ताहरूलाई १०० मिलियन डलरसम्मको प्याकेज प्रस्ताव गर्दै ठूलो मात्रामा भर्ती गरेका थिए।

सामाजिक सञ्जाल कम्पनीले १४ अर्ब डलर स्केल एआईमा लगानी गरेको छ र एआई भ्वाइस स्टार्टअप ‘प्ले एआई’ पनि खरिद गरेको छ। मेटाले अन्य एआई ल्याबहरूसँग अधिग्रहणबारे वार्ता समेत गरेको थियो। जुकरबर्गले एलन मस्कसँग समेत ओपनएआईमा ९७ अर्ब डलरको टेकओभर प्रस्तावमा सहभागी हुनबारे छलफल गरेका थिए। तर अन्ततः मेटा सामेल भएन र ओपनएआईले मस्कको प्रस्ताव अस्वीकार गर्‍यो।

मिडजर्नीसँगको सम्झौताका विस्तृत सर्तहरू सार्वजनिक गरिएको छैन। तर स्टार्टअपका सीईओ डेभिड होल्जले ‘एक्स’ मा लेख्दै कम्पनी स्वतन्त्र रहेको र कुनै बाह्य लगानीकर्ता नभएको स्पष्ट पारे। विगतमा मेटाले मिडजर्नीलाई अधिग्रहण गर्नेबारे छलफल गरेको बताइए पनि सम्झौता भएन।

२०२२ मा स्थापित मिडजर्नी छोटो समयमै एआई चित्र निर्माण क्षेत्रमा अग्रणी बनेको थियो। २०२३ सम्ममा यसले करिब २०० मिलियन डलर राजस्व आर्जन गर्ने अनुमान गरिएको थियो।

कम्पनीले १० डलर प्रतिमहिना बाट सुरु हुने सदस्यता योजना ल्याएको छ, जसको प्रिमियम स्तर १२० डलरसम्म पर्छ। यसै वर्ष जुन महिनामा मिडजर्नीले आफ्नो पहिलो एआई भिडियो मोडल ‘भी१’ सार्वजनिक गरेको थियो।

यो साझेदारी दुई महिनापछि भएको हो जब डिज्नी र युनिभर्सलले मिडजर्नीविरुद्ध मुद्दा दायर गर्दै कपीराइट सामग्रीमा आधारित प्रशिक्षण गरेको आरोप लगाएका थिए। अन्य एआई मोडल विकासकर्ता—मेटा समेत—यस्ता मुद्दामा परेका छन्। तर हालका केही अदालतका निर्णयहरू टेक कम्पनीहरूको पक्षमा आएका छन्।