एनभिडियाका सीईओ टीएसएमसीका अधिकारी भेट्न ताइवान भ्रमणमा

काठमाडौं ।

एनभिडियाका प्रमुख कार्यकारी अधिकृत जेन्सेन हुआङ शुक्रबार चिप निर्माण साझेदार टीएसएमसीका अधिकारी भेट्न ताइपेई पुगेका छन्। विश्वकै सबैभन्दा मूल्यवान कम्पनी मानिएको एनभिडिया हाल वाशिङटन र बेइजिङबीच यसको एआई चिपमा पहुँचका विषयमा बढ्दो तनावबीच अघि बढिरहेको छ।

एनभिडियाको बुधबार सार्वजनिक हुने आम्दानी प्रतिवेदनभन्दा केही दिनअघि भएको उनको यो भ्रमण कम्पनीले आफ्नो केही आपूर्तिकर्तालाई एच२० चिपसँग सम्बन्धित काम रोक्न आग्रह गरेपछि भएको हो। यसअघि बेइजिङले उक्त चिपमा सुरक्षा जोखिम रहेको चेतावनी दिएको थियो। एनभिडियाले चीनको बजारलाई लक्षित गरी नयाँ एआई चिप विकास पनि गरिरहेको छ।

“म यहाँ आउनुको मुख्य उद्देश्य टीएसएमसी भेट्नु हो,” उनले पत्रकारलाई बताएका यो कुरा ताइपेईको सङशान विमानस्थलमा अवतरणको प्रत्यक्ष प्रसारणमार्फत पुष्टि भएको हो, जहाँ उनी निजी विमानमार्फत आएका थिए। हुआङले टीएसएमसीले आफूलाई भाषण दिन अनुरोध गरेको पनि जनाए। टीएसएमसीले विज्ञप्ति जारी गर्दै हुआङले “व्यवस्थापन दर्शन” सम्बन्धी आन्तरिक सम्बोधन गर्ने जनाएको थियो। थप विवरण भने दिइएको छैन।

हुआङका अनुसार उनी टीएसएमसीलाई धन्यवाद दिन आएका हुन्, जहाँ एनभिडियाका लागि नयाँ जीपीयू र सिलिकन फोटोनिक्स प्रोसेसरसहित ६ वटा नयाँ चिपको डिजाइन अन्तिम गरिएको छ। चिप उत्पादन सुरु गर्न सक्ने अवस्थामा पुग्ने प्रक्रियालाई ‘टेप आउट’ भनिन्छ।

“यो हाम्रो इतिहासमै पहिलो वास्तुकला हो जहाँ हरेक चिप नयाँ र क्रान्तिकारी छ,” उनले भने। “हामीले सबै चिपहरू टेप आउट गरिसकेका छौँ।”

यसअघि यसै महिनामा अमेरिकी राष्ट्रपति डोनाल्ड ट्रम्पले एच२० भन्दा अघि बढेका उन्नत एनभिडिया चिप चीनमा बेच्न सक्ने सम्भावनाको ढोका खोलेका थिए। साथै, एनभिडिया र एएमडीसँग सम्झौता भएको थियो, जसअनुसार चीनमा केही उन्नत चिप बिक्री हुँदा प्राप्त आम्दानीको १५ प्रतिशत अमेरिकी सरकारले पाउनेछ।

रोयटर्सले यसै हप्तामा एनभिडिया आफ्नो नवीनतम ब्ल्याकवेल वास्तुकलामा आधारित बी३०ए नाम दिइएको नयाँ चिप विकास गरिरहेको खबर दिएको छ, जुन एच२० भन्दा शक्तिशाली हुनेछ।

बी२०ए का बारेमा सोध्दा हुआङले भने, एनभिडिया अमेरिकासँग एच२० चिपको उत्तराधिकारी चीनलाई उपलब्ध गराउने विषयमा छलफलमा रहेको छ, तर यो निर्णय कम्पनीको नभई अमेरिकी सरकारको हुने स्पष्ट गरे।

“यो त अमेरिकी सरकारको निर्णयमा निर्भर हुन्छ। हामी वार्तामा छौँ, तर अहिले केही भन्न सक्ने बेला भएको छैन,” उनले भने।

एनभिडियाले यसै वर्ष जुलाईमा मात्रै एच२० चिप पुनः चीनमा बिक्री गर्ने अनुमति पाएको थियो। यो चिप २०२३ मा लागू गरिएको निर्यात प्रतिबन्धपछि चीनलाई लक्षित गरी विशेष रूपमा बनाइएको थियो। तर अप्रिलमा कम्पनीलाई बिक्री रोक्न आकस्मिक आदेश दिइएको थियो।

वाशिङटनको अनुमति पाएलगत्तै एनभिडियाले टीएसएमसी सँग ३ लाख एच२० चिपको अर्डर दिएको थियो, चीनका कम्पनीहरूबाट बढ्दो मागका कारण। तर केही दिनमै चीनको साइबर नियामक निकाय र राज्य सञ्चालित मिडियाले अमेरिकी कम्पनीका चिपमा सुरक्षा जोखिम हुनसक्ने आरोप लगाएका थिए।

चिनियाँ अधिकारीहरूले पछि चीनका प्रविधि कम्पनीलाई एच२० चिप खरिद गर्दा सम्भावित सूचना सुरक्षा जोखिमको चेतावनी दिएका थिए। एनभिडियाले भने आफ्ना चिपमा कुनै ‘ब्याकडोर’ जोखिम नरहेको दाबी गरेको छ।

एनभिडियाले फक्सकनलाई एच२० चिपसँग सम्बन्धित काम रोक्न आग्रह गरेको समाचार शुक्रबार रायटरले दुई स्रोतलाई उद्धृत गर्दै प्रकाशित गरेको छ। तेस्रो स्रोतका अनुसार एनभिडियाले पहिले आफ्नो हाल रहेको एच२० भण्डार प्रयोग गर्ने चाहेको छ।