काठमाडौं ।
यूट्युबले पनि इन्स्टाग्राम र टिकटकजस्तै सहकार्य अर्थात् कोल्याब फिचरको परीक्षण सुरु गरेको छ। यूट्युब हेल्पमा एकजना गुगल कर्मचारीले जानकारी दिँदै यो फिचरमार्फत क्रिएटरहरूले भिडियोमा अन्य सहकार्यकर्ता थप्न सक्ने बताएका छन्, जसले गर्दा उनीहरू एकअर्काको दर्शकहरूसम्म सिफारिस हुन सक्नेछन्।
इन्ग्याजेटका अनुसार हाल यो फिचर सीमित संख्यामा क्रिएटरहरूका लागि मात्र उपलब्ध छ, तर भविष्यमा यसको पहुँच विस्तार गर्ने योजना यूट्युबले बनाएको देखिन्छ। इन्फ्लुएन्सर मार्केटिङ सल्लाहकार लिन्डसे ग्याम्बलले थ्रेड्समा एक स्क्रीनसट सेयर गरेका छन्, जसले यो परीक्षण फिचर कसरी काम गर्छ भन्ने देखाउँछ।
ग्याम्बलले पोस्ट गरेको तस्बिरअनुसार, सहकार्यकर्ता थप्दा उनीहरूको नाम क्रिएटरको नामसँगै देखिनेछ। यदि धेरै सहकार्यकर्ता भए, विशेष गरी मोबाइलमा, भने “…एण्ड मोर” भनेर देखिनेछ। त्यसमा ट्याप गर्दा परियोजनामा संलग्न सबैको नामसहितको सूची खुल्नेछ, जसको छेउमा ‘सब्स्क्राइब’ बटन पनि देखिनेछ।
इन्स्टाग्राम र टिकटकमा जस्तै, युट्युबमा पनि भिडियोलाई अपलोड गर्ने क्रिएटरले अरू अकाउन्टलाई सहकार्यका लागि आमन्त्रण गर्नुपर्नेछ, र आमन्त्रित व्यक्तिले त्यसलाई स्वीकृति दिनुपर्नेछ। यसले क्रिएटरहरूले अरू प्रयोगकर्तालाई अनधिकृत रूपमा भिडियोमा थप्न नपाउन सुनिश्चित गर्नेछ। तर, सहकार्यकर्ताहरूले अपलोडरको निजी जानकारी (जस्तै एनालिटिक्स आदि) हेर्न पाउने कि नपाउने भन्ने भने स्पष्ट गरिएको छैन।
प्रकाशित: २० श्रावण २०८२, मंगलवार
