स्पेसएक्स क्रू ड्र्यागन अन्तर्राष्ट्रिय अन्तरिक्ष केन्द्रमा डक

काठमाडौं ।

शनिबार एक अन्तर्राष्ट्रिय टोलीसहितको स्पेसएक्स क्रू ड्र्यागन क्याप्सुल अन्तर्राष्ट्रिय अन्तरिक्ष केन्द्र (आईएसएस) सँग सफलतापूर्वक डक भएको छ।

“डकिङ पुष्टि भएको छ!”, स्पेसएक्सले सामाजिक सञ्जालमा पोस्ट गर्दै लेखेको छ। भिडियोमा क्याप्सुलले बिहान २:२७ (पूर्वी समयअनुसार) अर्थात् ०६:२७ जीएमटीमा पृथ्वीको दक्षिणपूर्वी प्रशान्त महासागर माथि आईएसएस सँग सम्पर्क गरेको देखिन्छ।

६ महिने मिसनका लागि आईएसएसमा सहभागी हुने चार सदस्यीय टोलीमा अमेरिकी अन्तरिक्ष यात्री जेना कार्डम्यान र माइक फिन्क, जापानका किमिया युई, र रसियाका अन्तरिक्ष यात्री ओलेग प्लाटोनोभ छन्। उनीहरू शुक्रबार बिहान फ्लोरिडास्थित केनेडी स्पेस सेन्टरबाट फाल्कन ९ रकेटमा चढेर प्रक्षेपण भएका थिए।

यो नासाको कमर्सियल क्रू प्रोग्राम अन्तर्गतको ११औं क्रू रोटेसन मिसन हो, जसले स्पेस शटल युगपछिको वैकल्पिक प्रणालीका रूपमा निजी उद्योगसँग सहकार्य गरेर अगाडि बढाइएको हो।

“हामीसँग चिसो पेय, तातो खाना र हामी आफैँ तपाईंहरूको पर्खाइमा छौं — चाँडै भेटौँला,” आईएसएसका पुराना सदस्यहरूले नयाँ आगन्तुकहरूलाई सम्बोधन गर्दै भिडियोमा भनेका छन्। “नमस्ते स्पेस स्टेशन — क्रू ११ यहाँ आइपुगेको छ र हामी धेरै उत्साहित छौं,” फिन्कले जवाफ दिए। आफ्नो बसाइँको क्रममा, क्रू–११ ले अमेरिकी नेतृत्वमा चलिरहेको आर्टेमिस कार्यक्रमअन्तर्गत चन्द्रमाको दक्षिण पोल नजिक हुने सम्भावित अवतरण परिस्थितिको अभ्यास गर्नेछ।

ह्यान्डहेल्ड कन्ट्रोलर र विभिन्न डिस्प्ले स्क्रिनमार्फत, उनीहरूले गुरुत्वाकर्षणमा हुने परिवर्तनले अन्तरिक्ष यात्रीहरूले यान चलाउँदा कस्तो असर पार्छ भन्ने परीक्षण गर्नेछन्, जसमा भविष्यका चन्द्रयानहरू पनि समावेश छन्।

सन् २००० यता लगातार मानव बसोबास भइरहेको आईएसएस गहिरो अन्तरिक्ष अन्वेषणका लागि परीक्षणस्थलको रूपमा प्रयोग हुँदै आएको छ — जसमा भविष्यको मंगल मिसन पनि समावेश छ।

क्रू–११ सँगै ल्याइएको चाखलाग्दो सामग्रीमध्ये एक हो, अर्मेनियाका अनारका बीउहरू। ती बीउहरू पृथ्वीमा राखिएको कन्ट्रोल ब्याचसँग तुलना गरेर सूक्ष्म गुरुत्वाकर्षणले बालीको वृद्धि कस्तो असर गर्छ भन्ने अध्ययन गरिनेछ।

आईएसएस सन् २०३० पछि बन्द गरिने योजना छ, त्यसपछि यसको कक्ष तल झारिँदै प्रशान्त महासागरको दुर्गम बिन्दु ‘पोइन्ट नेमो’ माथि वायुमण्डलमा जलाएर नष्ट गरिनेछ। यो ठाउँलाई अन्तरिक्ष यानहरूको चिहान पनि भनिन्छ।-रासस/एएफपी