आईफोन १७ एयरमा निकै सानो आकारको ब्याट्री हुने

काठमाडौं ।

एप्पलले यस वर्ष आईफोन १७, १७ प्रो र १७ प्रो म्याक्ससँगै आईफोन १७ एयर पनि अनावरण गर्ने अपेक्षा गरिएको छ। आईफोन १७ एयर धेरै पातलो हुनेछ र यसले लाइनमा रहेको प्लस मोडेललाई प्रतिस्थापन गर्नेछ। साथै प्लस मोडेलले अहिलेसम्मकै सबैभन्दा खराब बिक्री गरेको छ।

निकै नै स्लिम (पातलो) हुने आईफोन १७ एयरमा आईफोन १६ई को जस्तै एउटा मात्र रियर क्यामरा हुनेछ। यस बाहेक डिभाइसमा सानो ब्याट्री समावेश गरिएको हल्ला पनि सुन्नमा आएका छन्। त्यसैगरी हालैको एउटा नयाँ लीकले तस्बिरहरूमार्फत आईफोन १७ एयरमा समावेश गरिएको ब्याट्रीको खुलासा गरेको छ।

लीक भएका तस्बिरहरूका अुसार आईफोन १७ एयरको ब्याट्री क्षमता “लगभग २,९०० एमएएच” हुने अपेक्षा गरिएको छ जुन आईफोनहरूको लागि पनि अविश्वसनीय रूपमा सानो भएको उल्लेख गरिएको छ (जुन एन्ड्रोइड डिभाइसहरू भन्दा बढी इफिसियन्ट हुनेछन्)। तुलनाको लागि, भेनिला आईफोन १६ मा ३,५६१ एमएएच सेल रहेको छ र त्यो परिवारको सबैभन्दा सानो ब्याट्री भएको जीएसएमएरिनाले उल्लेख गरेको छ।

आईफोन १७ एयरको ब्याट्री स्टीलमा बन्द गरिएको हुनेछ। यस्तो प्रविधि पहिलो पटक गत वर्षको आईफोन १६ प्रोमा प्रयोग गरिएको थियो। स्टील केसले आफ्नो उच्च संरचनात्मक प्रतिरोधको कारणले गर्दा हिट (ताप) डिसिपेसन र ब्याट्री डेनसिटी (घनत्व) सुधार गर्ने मानिन्छ। स्टील केसलाई फोनको भित्री भागको एल–आकारको डिजाइनसँग पनि धेरै सजिलै एकीकृत गर्न सकिने र कम–आकारको लोजिक बोर्डमा पूर्ण रूपमा फिट हुने बताइएको छ।

सम्पूर्ण आईफोन १७ लाइनअपमा नयाँ ब्याट्री एडेसिभहरूको साथ आउने बताइएको छ जसले प्रतिस्थापनलाई सजिलो बनाउन काम गर्नेछ। नयाँ डिभाइसहरू सेप्टेम्बरमा अनावरण गरिने सम्भावनाको उल्लेख गरिएको छ।