बिटक्वाइनले पहिलो पटक पार गर्यो कीर्तिमानी १ लाख २० हजार डलर

काठमाडौं ।

बिटकाइनले सोमबार पहिलो पटक १ लाख २० हजार डलर पार गरेको छ। विश्वको सबैभन्दा ठूलो क्रिप्टोकरेन्सीका लागि यो महत्वपूर्ण उपलब्धि भएको छ, किनभने लगानीकर्ताहरू यस साता उद्योगले लामो समयदेखि खोजिरहेको नीतिगत उपलब्धिमा भरोसा गरिरहेका छन्।

बिटकाइनले सोमबार एशियाली सत्रमा १ लाख २१ हजार २०७ डलर ५५ सेन्टको कीर्तिमानी उच्च विन्दु छोएको थियो। त्यसपछि मूल्य केही घटेर अन्तिम कारोबारमा १.६ प्रतिशतले बढ्दै १ लाख २१ हजार १५ डलर ४२ सेन्टमा पुगेको थियो।

सोमबारदेखि अमेरिकी प्रतिनिधि सभा (हाउस अफ रिप्रेजेन्टेटिभ्स) ले डिजिटल सम्पत्ति उद्योगका लागि लामो समयदेखि माग हुँदै आएको नियामक रूपरेखा प्रदान गर्ने विधेयकहरूमा छलफल सुरु गर्ने भएको छ।

रोयटर्सका अनुसार यी मागहरू राष्ट्रपति डोनाल्ड ट्रम्पसँग मेल खाने देखिएको छ। उनले आफूलाई “क्रिप्टो राष्ट्रपति” भनेका छन् र नीति निर्माणकर्ताहरूलाई उद्योगको पक्षमा नियमहरू पुनःसंरचना गर्न आग्रह गरेका छन्।

“यो अहिले थुप्रै सकारात्मक कारणले उकासिएको छ,” आईजी मार्केटका विश्लेषक टोनी साइकामोरले भने। उनले संस्थागत माग, थप मूल्यवृद्धिको अपेक्षा, र ट्रम्पको समर्थनलाई मूल्य वृद्धिको कारण बताएका छन्। “यो पछिल्ला छ–सात दिनमा निकै बलियो उचाइमा पुगेको छ, अहिले यो कहाँ रोकिन्छ भन्न गाह्रो छ। सहजै १ लाख २५ हजार डलरको तहसम्म पुग्न सक्छ कि जस्तो देखिन्छ,” उनले भने।

बिटकाइन हालसम्म वर्षभरि २९ प्रतिशतले वृद्धि भइसकेको छ। यस वृद्धिले ट्रम्पको अव्यवस्थित महसुल नीतिका बाबजुद पनि अन्य क्रिप्टोकरेन्सीहरूमा पनि पछिल्ला केही कारोबार सत्रमा व्यापक उकालो ल्याएको छ।

दोस्रो ठूलो टोकन इथरको मूल्य ३ हजार ५० डलर ९० सेन्ट पुगेको छ, जुन पाँच महिनाभन्दा बढीको उच्च विन्दु हो। एक्सआरपी र सोलानाले करिब ३ प्रतिशतको वृद्धि गरेका छन्।
कोइनमार्केटक्यापको तथ्यांकअनुसार कुल क्रिप्टो बजार मूल्य करिब ३.७८ ट्रिलियन डलर पुगेको छ।

यस महिनाको सुरुमा वासिङ्टनले जुलाई १४ को साता “क्रिप्टो साता” घोषणा गरेको थियो, जसमा कंग्रेसका सदस्यहरूले जीनियस एक्ट, क्लारिटी एक्ट, र एन्टि–सीबीडीसी सर्भेइलान्स स्टेट एक्टमा मतदान गर्ने तय भएको छ।

यीमध्ये सबैभन्दा महत्वपूर्ण जीनियस एक्ट हो, जसले स्टेबलकोइनका लागि संघीय नियमहरू बनाउनेछ। यसैबीच, हङकङमा सूचीबद्ध क्रिप्टो इक्सचेन्ज–ट्रेडेड फन्ड (ईटीएफ) का मूल्यहरू पनि उक्लिएका छन्।

चाइना एएमसी, हार्भेस्ट, र बोसेराले सुरू गरेका स्पट बिटकाइन ईटीएफहरूले कीर्तिमानी उच्च विन्दु छोएका छन्, जबकि ती तीनवटा इथर ईटीएफहरू पनि करिब २ प्रतिशतले बढेका छन्।