एपिक गेम्सले सामसङ विरुद्धको प्रतिस्पर्धा विरोधी मुद्दा सुल्झायो

काठमाडौं ।

फोर्टनाइट बनाउने कम्पनी एपिक गेम्सले सामसङ विरुद्धको प्रतिस्पर्धाविरोधी सुल्झाएको छ। अदालतमा दर्ता गरिएको दस्तावेजअनुसार दुवै पक्षबीच सहमति भएपछि मुद्दा खारेज गरिएको हो।

गत सेप्टेम्बरमा दर्ता गरिएको सो मुद्दामा एपिकले सामसङलाई गुगलसँग मिलेर आफ्ना स्मार्टफोनमा प्रतिस्पर्धी एप स्टोरहरूलाई रोक्ने आरोप लगाएको थियो।

एपिकका सीईओ टिम स्वीनीले एक्स मा लेख्दै भने, “दुवै पक्षहरूबीच छलफलपछि हामीले सामसङ विरुद्धको मुद्दा खारेज गरिरहेका छौं।” उनले थप लेखे, “सामसङले एपिकका चिन्ताहरू सम्बोधन गर्ने भएकोमा हामी आभारी छौं।”

एपिकका प्रवक्ताले स्वीनीको पोस्टलाई उद्धृत गर्दै थप टिप्पणी गर्न अस्वीकार गरेका टेकक्रञ्चले उल्लेख गरेको छ। सामसङ र गुगल दुवैले प्रतिक्रिया अनुरोधमा कुनै जवाफ दिएका छैनन्।

एपिकले मुद्दामा सामसङको “अटो ब्लकर” फिचरले गुगल प्ले स्टोर र सामसङ ग्यालेक्सी स्टोर बाहेकका स्रोतबाट डाउनलोड हुन नदिने व्यवस्था प्रतिस्पर्धामा अवरोध गर्न मिलेर गरिएको प्रयास भएको दावी गरेको थियो।

त्यसबेला गुगलले एपिकको मुद्दालाई “निराधार” भन्दै प्रतिक्रिया दिएको थियो र “एण्ड्रोइड उपकरण निर्माता आफ्ना प्रयोगकर्तालाई सुरक्षित राख्न आफ्नै उपाय अपनाउन स्वतन्त्र छन्” भनेको थियो। सामसङले पनि एपिक का दावीहरू “निराधार” भन्दै कडा रूपमा प्रतिवाद गर्ने बताएको थियो।

यो सहमति एपिकले आफ्नै मोबाइल एप स्टोर सुरु गरेको र त्यसबाट उसले आफ्ना खेलहरू र तेस्रो पक्षका गेमहरू वितरण गर्न थालेको लगभग एक वर्षपछि आएको हो।

सामसङ विरुद्ध मुद्दा दर्ता गर्नुअघि एपिकले २०२३ मा गुगल विरुद्धको प्रतिस्पर्धाविरोधी मुद्दामा जित हासिल गरेको थियो। सो मुद्दामा अदालतले गुगल ले आफ्नो प्ले स्टोर प्रतिस्पर्धीहरूका लागि खोल्नुपर्ने आदेश दिएको थियो। यसमा गुगलको पुनरावेदनमाथिको अन्तिम निर्णय आउन भने बाँकी नै छ।