एआईको प्रयोग मार्फत पहिलो पटक १८ वर्षसम्म नि:सन्तान दम्पतीले सन्तान प्राप्त गर्न सफल

काठमाडौं ।

१८ वर्षसम्म गर्भधारणको लागि प्रयास गरिरहेका एक दम्पतीले बच्चा जन्माउनका लागि कृत्रिम बुद्धिमत्ता (एआई) को प्रयोग गरेका छन्। एआईको प्रयोगले अन्ततः महिला गर्भवती हुन सफल भएकी छिन्।

नाम नखुलाइएका दम्पतीले विश्वभर इन भिट्रो फर्टिलाइजेसन (आईभीएफ) को धेरै चरणहरू पार गरिसकेको भए तापनि कुनै नतिजा उपलब्धि नभएको उल्लेख गरिएको छ। एजुस्पर्मियाको कारणले गर्दा आईभीएफ प्रयासहरू असफल भएको एनडीटिभीले उल्लेख गरेको छ।

यो एक दुर्लभ अवस्था हो जसमा पुरुष पार्टनरको वीर्यमा कुनै मापनयोग्य शुक्राणु हुँदैन। एक सामान्य स्वस्थ वीर्य नमूनामा, प्रति मिलिलिटर लाखौं शुक्राणु कोषहरू हुन्छन्।

प्रत्येक ढोका ढकढक्याएपछि, दम्पतीले कोलम्बिया युनिभर्सिटी फर्टिलिटी सेन्टर (सीयूएफसी) मा एउटा नयाँ तरिका प्रयास गर्न पुगेको सीएनएनको एक रिपोर्टले उल्लेख गरेको छ।

दम्पतीले स्टार (STAR – स्पर्म ट्र्याकिङ एण्ड रिकभरी) विधि प्रयोग गरेको बताइएको छ। यस विधिले पुरुषहरूमा लुकेका शुक्राणु पहिचान गर्न एआई प्रयोग गर्दछ।

प्रजनन केन्द्रका अनुसन्धानकर्ताहरूले एआई–सञ्चालित प्रणालीको साथ वीर्य नमूनाको जाँच गरेर लुकेको शुक्राणु फेला पार्न सफल भएको उल्लेख गरिएको छ।

शुक्रकीट पुनःप्राप्त गरेपछि, यसलाई आईभीएफ मार्फत महिलाको अण्डासँग प्रजनन गर्न प्रयोग गरिएको र उनी स्टार विधि प्रयोग गरेर गर्भधारण गर्ने पहिलो महिला बन्न सफल भएकी छिन्।

“म साँच्चै गर्भवती छु भनेर विश्वास गर्न मलाई दुई दिन लाग्यो” महिलाले भनिन्। “म अझै पनि बिहान उठ्छु र यो सत्य हो कि होइन भनेर विश्वास गर्न सक्दिन। स्क्यान नदेखेसम्म मलाई अझै पनि म गर्भवती छु भन्ने विश्वास लागेन।”

स्टार विधिः

स्टार विधि सीयूएफसीका निर्देशक डा. जेभ विलियम्स र उनका सहकर्मीहरूले पाँच वर्षको अनुसन्धान पछि विकसित गरिएको विधि भएको बताइएको छ। वास्तविक जीवनमा विधिले नतिजा दिएपछि टोली पनि छक्क परेको उल्लेख गरिएको छ।

एक व्यक्तिले नमूना प्रदान गरेपछि उच्च कुशल प्राविधिकहरूले शुक्राणु खोज्ने प्रयास गरेका थिए। उक्त नमूनामा दुई दिनसम्म गरिएको प्रयासमा तिनीहरूले कुनै पनि शुक्राणु फेला पार्न नसकेको उल्लेख गरिएको छ।

त्यसपछि नमूनालाई एआई–आधारित स्टार प्रणालीमा ल्याइएको र एक घण्टामा, यस विधिले ४४ ओटा शुक्राणु फेला पारेको बताइएको छ। ‘त्यसैबेला नै यो वास्तवमै महत्वपूर्ण उपलब्धि भएको हामीले महसुस गर्यौं। यसले बिरामीहरूको लागि निकै ठूलो फरक पार्नेछ,’ अनुसन्धान टोलीको नेतृत्व गर्ने विलियम्सले बताए।

माइक्रोस्कोप मुनि विशेष रूपमा डिजाइन गरिएको चिपमा वीर्य नमूना राखेपछि, स्टार प्रणालीले सम्पूर्ण वीर्य नमूना स्क्यान गर्न र एक घण्टा भित्र आठ लाख भन्दा बढी छविहरू खिच्न उच्च–शक्तियुक्त इमेजिङ प्रयोग गर्ने उल्लेख गरिएको छ। त्यसैगरी शुक्राणु कोशिकाहरू पहिचान गर्न प्रशिक्षित गरिएको एआईले प्रजनन कोशिकालाई हेर्ने एनडीटिभीले रिपोर्ट गरेको छ।