स्पोटिफाईको डिस्कभर विक्ली प्लेलिस्टमा नयाँ अपडेट उपलब्ध

काठमाडौं ।

प्रत्येक सोमबार नयाँ गीतहरू सिफारिस गर्ने स्पोटिफाईको डिस्कभर विक्ली प्लेलिस्टमा अब नयाँ अपडेट आएको छ।

डिस्कभर विक्ली सुरुआत भएको १० वर्षपछि अब स्पोटिफाई प्रिमियम प्रयोगकर्ताहरूले प्लेलिस्टको माथिल्लो भागमा नयाँ नियन्त्रण फिचर देख्नेछन्, जसले प्रयोगकर्ताहरूलाई आफ्नो रोजाइअनुसारका विधाहरु छनोट गर्न दिन्छ।

उदाहरणका लागि, तपाईं मुख्यतः ८० को दशकको रक गीत सुन्नुहुन्छ तर पछिल्लो समय के-पपप्रति आकर्षण बढिरहेको छ भने, तपाईंले विभिन्न शैली छानेर सिफारिसहरू त्यसैअनुसार प्रभावित पार्न सक्नुहुन्छ।

यो फिचर प्रयोगकर्तालाई डिस्कभर विक्ली प्लेलिस्टबाट आफूलाई मनपर्ने प्रकारका नयाँ संगीत सुन्न अझ धेरै नियन्त्रण दिनका लागि ल्याइएको हो।

स्पोटिफाईका अनुसार अहिलेसम्म प्रयोगकर्ताहरूले डिस्कभर विक्लीमा १०० अर्बभन्दा धेरै ट्र्याकहरू सुनेका छन्, जसमा ७७ प्रतिशत गीतहरू नयाँ कलाकारका छन्।

नयाँ अपडेट भएको डिस्कभर विक्ली हेर्न स्पोटिफाई प्रिमियम प्रयोगकर्ताहरूले “मेड फर यू” सेक्शनमा गएर आफ्नो डिस्कभर विक्ली प्लेलिस्ट खोल्न सक्नेछन्। यदि स्पोटिफाईको नयाँ संस्करण प्रयोग भइरहेको छ भने, त्यहाँ नयाँ शैली नियन्त्रण फिचर देखिने टेकक्रञ्चले उल्लेख गरेको छ।

अल्गोरिदमिक सिफारिसहरूले भरिएको अनुभव दिने स्पोटिफाईले हालै प्रयोगकर्ताहरूलाई आफ्नो रोजाइअनुसार इनपुट दिन सक्ने फिचरहरू पनि ल्याएको छ। नयाँ अपडेटअनुसार अब प्रयोगकर्ताले क्युएमा आउने आगामी सिफारिसहरू पहिल्यै देख्न सक्नेछन् र कुन गीत रहने भन्ने छनोट गर्न सक्नेछन्। साथै, प्रयोगकर्ताले कुनै गीत ३० दिनका लागि ‘स्नूज’ पनि गर्न सक्नेछन्, जसले गर्दा त्यो गीत लामो समयसम्म लुकाउने छैन, तर चाँडै नबज्ने पनि हुन्छ।