आफ्ना उत्पादन चलाउन गुगलको चिप प्रयोग गर्दै ओपनएआई

काठमाडौं ।

ओपनएआईले हालसालै आफ्नो उत्पादनहरू चलाउनका लागि गुगलको कृत्रिम बुद्धिमत्ता चिपहरू भाडामा लिन थालेको छ। यो घटनासँग नजिक रहेको एक स्रोतले शुक्रबार जानकारी  दिएको रोयटर्सले जनाएको छ।

च्याटजीपीटी बनाउने ओपनएआईका ग्राफिक्स प्रोसेसिङ युनिट (जीपीयू) का सबैभन्दा ठूलो खरिदकर्तामध्ये एक हो। उसले यी चिपहरू आफ्ना एआई मोडलहरूलाई प्रशिक्षण दिन र नयाँ जानकारीका आधारमा भविष्यवाणी वा निर्णय गर्न प्रयोग हुने इन्फरेन्स कम्प्युटिङका लागि प्रयोग गर्छ।

ओपनएआईले बढ्दो कम्प्युटिङ आवश्यकताहरू पूरा गर्न गुगल क्लाउड सेवा थप्ने योजना बनाएको कुरा यसै महिनाको सुरुवातमै रोयटर्सले विशेष रूपमा रिपोर्ट गरिसकेको थियो। यो कदम एआई क्षेत्रमा दुई प्रमुख प्रतिस्पर्धीहरूबीचको अप्रत्याशित सहकार्यको संकेत हो।

गुगलका लागि, यो सम्झौता त्यस्तो समयमा आएको हो जब उसले आफ्नै टेन्सर प्रोसेसिङ युनिट (टीपीयू) हरूको बाह्य पहुँच विस्तार गरिरहेको छ, जुन अघिसम्म आन्तरिक प्रयोजनका लागि मात्र राखिएको थियो।

यसले गुगललाई एप्पलजस्ता ठूला प्रविधि कम्पनीहरू र एन्थ्रोपिक तथा सेफ सुपरइन्टेलिजेन्स जस्ता ओपनएआई का प्रतिस्पर्धी स्टार्टअपहरू समेत ग्राहकका रूपमा जित्न मद्दत गरेको थियो। यी दुबै कम्पनीहरू पूर्व ओपनएआई नेताहरूले स्थापना गरेका हुन्।

गुगलको टीपीयू भाडामा लिनु ओपनएआईले पहिलो पटक एनभिडिया बाहेकको चिप प्रयोग गरेको देखिन्छ, जसले साम अल्टम्यान नेतृत्वको कम्पनीले माइक्रोसफ्टको डाटा केन्द्रमा निर्भरता घटाउने संकेत दिन्छ। यसले एनभिडियाका जीपीयूको तुलनामा सस्तो विकल्पको रूपमा टीपीयूको प्रयोग बढ्न सक्ने सम्भावना देखाएको द इन्फर्मेशनले रिपोर्ट गरेको छ।

ओपनएआईले गुगल कलाउडमार्फत भाडामा लिइएको टीपीयूले इन्फरेन्स लागत घटाउन सहयोग गर्ने आशा गरेको रिपोर्टमा उल्लेख गरिएको छ।

तर, गुगलले आफ्ना सबैभन्दा शक्तिशाली टीपीयू चिपहरू ओपनएआई लाई नदिएको द इन्फर्मेशनले गुगल क्लाउडका एक कर्मचारीलाई उद्धृत गर्दै बताएको छ।