पेवेल र सजिलो पेको लाइसेन्स खारेज

काठमाडौं ।

नेपाल राष्ट्र बैंकले भुक्तानी सेवा प्रदायक पेवेल नेपाल प्रा. लि. तथा सजिलो पे पेमेन्ट सर्भिसेज प्रा. लि. लाई प्रदान गरिएको अनुमतिपत्र खारेज गरेको छ।

केन्द्रीय बैंकले आज एक सूचना प्रकाशित गरी यी दुई कम्पनीलाई प्रदान गरिएको भुक्तानी सेवा प्रदायकको अनुमतिपत्र खारेज गरेको जानकारी दिएको हो।

यी दुई कम्पनीले ‘भुक्तानी तथा फस्र्यौट ऐन, २०७५, भुक्तानी तथा फछ्र्यौट विनियमावली, २०७७, भुक्तानी प्रणालीसम्बन्धी एकीकृत निर्देशन, २०८१ तथा सम्पत्ति शुद्धीकरण (मनी लाउन्डरिङ्ग) निवारण ऐन, २०६४ का विभिन्न प्रावधानहरूको उल्लङ्घन गरेको पाइएकोले’ लाइसेन्स खारेज गरिएको सूचनामा उल्लेख छ।

बैंकको सञ्चालक समितिको हिजो असार ५ को निर्णयानुसार भुक्तानी तथा फर्स्यौट ऐन, २०७५ को दफा ३५ को उपदफा (१) को खण्ड (च) को व्यवस्थाअनुसार उक्त संस्थाहरूको अनुमतिपत्र खारेज गरिएको राष्ट्रबैकले जनाएको छ।