ट्रम्पको कर छल्न फक्सकनद्वारा भारतबाट निर्यात गरिएका लगभग ९७ प्रतिशत आईफोन अमेरिका पठाइयो: रिपोर्ट

काठमाडौं ।

मार्चदेखि मे २०२५ सम्म भारतबाट फक्सकनद्वारा निर्यात गरिएका लगभग सबै आईफोनहरू अमेरिका पठाइएको भन्सारको तथ्यांकले देखाएको छ।

यो संख्या सन् २०२४ को औसत ५० प्रतिशत भन्दा निकै माथि हो र चीनमाथि लगाइएको उच्च अमेरिकी कर छल्ने एप्पलको प्रयासको स्पष्ट संकेत हो।
रोयटर्सले पहिलो पटक रिपोर्ट गरेको यस तथ्यांक अनुसार, एप्पलले भारतबाट हुने निर्यातलाई प्रायः अमेरिका केन्द्रित बनाएको छ जुन अघिल्लो समय नेदरल्यान्ड्स, चेक गणराज्य र बेलायत लगायतका देशहरूमा वितरण गरिएको थियो।

मार्चदेखि मे अवधिमा फक्सकनले भारतबाट ३.२ अर्ब डलर बराबरका आईफोन निर्यात गरेको थियो, जसमा औसत ९७ प्रतिशत अमेरिका पठाइएको थियो। सन् २०२४ को औसत भने ५०.३ प्रतिशत मात्र थियो।
फक्सकनले मे २०२५ मा मात्र अमेरिका पठाएका आईफोनको मूल्य लगभग १ अर्ब डलर बराबर थियो जुन मार्चको कीर्तिमान १.३ अर्ब डलर पछिको दोस्रो उच्च निर्यात हो।

एप्पलले यसबारे कुनै टिप्पणी गरेको छैन भने फक्सकन ले पनि प्रतिक्रिया नदिएको रोयटर्सले उल्लेख गरेको छ।

अमेरिकी राष्ट्रपति डोनाल्ड ट्रम्पले बुधबार भने चीनमाथि ५५ प्रतिशत शुल्क लागु गरिने बताएका छन्, यद्यपि यो योजना दुवै देशका नेताहरूको स्वीकृति पछि लागू हुनेछ।

भारतमा भने अधिकांश अमेरिकी व्यापार साझेदारजस्तै आधारभूत १० प्रतिशत शुल्क लागु हुन्छ। यद्यपि, ट्रम्पले अप्रिलमा घोषणा गरेर पछि स्थगित गरेको २६ प्रतिशत “प्रतिस्पर्धात्मक” शुल्क टार्न भारतले सम्झौता गर्न प्रयास गरिरहेको छ।

भारतमा एप्पलको बढ्दो उत्पादनमाथि ट्रम्पले मे महिनामा कडा प्रतिक्रिया दिएका थिए। “हामी तपाईंलाई भारतमा निर्माण गर्न चाहँदैनौं, भारतले आफैलाई सम्हाल्न सक्छ, हामी तपाईंलाई यहाँ (अमेरिका) निर्माण गर्न चाहन्छौं,” ट्रम्पले सीईओ टिम कुकसँग भनेको स्मरण गरे।

यस वर्षको पहिलो पाँच महिनामा फक्सकनले भारतबाट ४.४ अर्ब डलर बराबरका आईफोन अमेरिका पठाइसकेको छ जुन सन् २०२४ को पूरै वर्षको ३.७ अर्ब डलरभन्दा बढी हो।

एप्पलले चीनबाट अमेरिका पठाइएका फोनहरूमा लाग्ने शुल्क उच्च भएको कारण उत्पादन भारतमा तीव्र बनाउन थालेको हो। मार्चमा कम्पनीले आईफोन १३, १४, १६ र १६ई मोडेलहरू चार्टर्ड विमानमार्फत लगभग २ अर्ब डलर बराबरका फोन अमेरिका पठाएको थियो।