स्पेसशिपहरुमा ध्यान केन्द्रित गर्ने मस्कको भनाई

काठमाडौं ।

भर्खरै डिपार्टमेन्ट अफ गभर्नमेन्ट इफसियन्सी छोडेका अर्बपति इलन मस्कले आफू स्पेसशिपहरुमा ध्यान केन्द्रित गर्ने बताएका छन्।

रिपोर्टर डेभिड पोगले स्पेसएक्सका सीईओ मस्कलाई उनका सहयोगी डोनाल्ड ट्रम्पको अन्तर्राष्ट्रिय विद्यार्थीहरूमा बढ्दो प्रतिबन्धसमेतका नीतिहरूबारे सोधेपछि ईलन मस्कको सीबीएस सन्डे मर्निङसँगको अन्तर्वार्ता केही असजिलो सुरुवातबाट अघि बढेको देखिन्थ्यो।

“म अहिलेको विषयमा केन्द्रित रहन चाहन्छु, जुन स्पेससिप्सबारे हो, राष्ट्रपति नीतिबारे होइन,” मस्कले भने। पोगले अचम्म मान्दै बोले, “ओहो, मलाई त भनिएको थियो ‘कुनै पनि कुरा सोध्न मिल्छ।’

“होइन,” मस्कले टाढा हेर्दै जवाफ दिए। “खैर… होइन।”

तर उनले आफ्नो डिपार्टमेन्ट अफ गभर्मेन्ट एफिसिएन्सी (डीओजीई) बारे भने टिप्पणी गरे। यसले संघीय निकायहरूमा ठूलो कटौती गरिरहेको छ, र जुन मस्कका अनुसार “सबै कुराको दोषी बनाइएको छ। कुनै पनि कटौती — वास्तविक होस् वा कल्पित डीओजीई माथि नै दोष लाग्थ्यो,” उनले भने।

मस्कले ट्रम्प प्रशासनका सन्दर्भमा आफू “अलिक अल्झिएको” अनुभव गरिरहेको पनि बताए, “म प्रशासनविरुद्ध बोलेर टाढा हुन चाहन्न, तर म प्रशासनले गरिरहेका सबै कामहरूको जिम्मेवारी लिन पनि चाहन्न।”

पोगको यो अन्तर्वार्ता मंगलबारको स्पेसएक्स स्टारशिप परीक्षण उडानअघि लिइएको थियो। त्यो परीक्षणमा यान सफलतापूर्वक प्रक्षेपण भए पनि पुनःप्रवेशमा नियन्त्रण गुमेको थियो।

एक्सएआई, एक्स (पूर्व ट्विटर), न्युरालिंक र द बोरिङ कम्पनीजस्ता विभिन्न कम्पनीहरूबीच  केही साझा तत्व छ कि छैन भनेर सोध्दा  उनले जवाफ दिए, “तपाईं भन्न सक्नुहुन्छ यी सबै व्यवसायहरू सभ्यताको सम्भावित मार्ग सुधार गर्ने प्रयासहरू हुन्।”

टेकक्रञ्चका अनुसार त्यसबेला मस्कले सरकारसँगको कामबाट पछि हट्दै गरेको बताएका थिए, तर हप्तामा “एक-दुई दिन” संलग्न रहने बताएका थिए। पोगलाई उनले भने, ‘डीओजीई त निरन्तर चल्नेछ, जीवनशैलीको रूपमा। म केही हदसम्म संलग्न त रहनेछु, तर जस्तो म पहिले पनि भनिसकेको छु, अहिले मेरो ध्यान कम्पनीहरूमै केन्द्रित रहनुपर्नेछ।”

पोगले अन्तर्वार्तापछि मस्कले ट्रम्प समर्थित बजेट विधेयकको आलोचना गरेको अंश सार्वजनिक भएपछि त्यो नै छुट्टै समाचार चक्रको विषय बनेको बताएका छन्।

त्यसपछि मस्कले आफू विशेष सरकारी कर्मचारीको रूपमा काम अन्त्य गरेको घोषणा गरेको उनकव भनाई छ। यद्यपि ट्रम्पले भने, “मस्क साँच्चिकै जाँदैछन् भन्ने होइन,” भनेर प्रतिक्रिया दिएका छन्।