आईओएसमा बाह्य लिंकबाट भुक्तानी भएपछि बिक्री बढैको स्पोटीफाईको भनाई

काठमाडौं ।

स्पोटीफाईले आफ्नो आईओएस एपमार्फत प्रयोगकर्ताहरूलाई बाह्य भुक्तानी लिङ्कतर्फ निर्देशित गर्ने नयाँ क्षमताले बिक्रीमा सकारात्मक प्रभाव पारेको बताएको छ।

एपिक गेम्स र एप्पलबीच चलिरहेको कानुनी लडाइँमा स्पोटीफाईले एपिकको समर्थनमा दिएको नयाँ एमिकस ब्रिफमा, कम्पनीले आफ्नै आन्तरिक तथ्याङ्कलाई उद्धृत गर्दै हालैको वेब पेमेन्टसम्बन्धी अपडेटपछि “आईओएस प्रयोगकर्ताहरूले प्रिमियम सदस्यतामा अपग्रेड गर्ने दरमा उल्लेखनीय वृद्धि” देखिएको दावी गरेको छ।

क्यालिफोर्नियाको उत्तरी जिल्ला अदालतले फोर्टनाइट निर्माता एपिक गेम्सको पक्षमा निर्णय गरेपछि, एप्पललाई अन्ततः अमेरिकी एप विकासकर्ताहरूलाई आफ्ना आईओएस एपमार्फत बाह्य भुक्तानी विकल्पतर्फ प्रयोगकर्ताहरूलाई जानकारी दिन अनुमति दिन बाध्य बनाइएको थियो।

अब, अमेरिकी आईओएस एप विकासकर्ताहरूले वेब बिलिङ विकल्प र सोझै तिर्दा उपलब्ध हुने छुटबारे प्रयोगकर्तालाई जानकारी दिन सक्ने टेकक्रञ्चले उल्लेख गरेको छ।

स्पोटीफाईले नयाँ नीतिको फाइदा उठाउने पहिलो कम्पनीहरूमध्ये एकका रूपमा आफ्नो आईओएस एप अपडेट गरेको थियो। अपडेट गरिएको संस्करणले प्रयोगकर्तालाई सदस्यता मूल्य कति पर्छ भन्ने देखाउने, वेबसाइटमा खरीद गर्न पठाउने, र श्रव्यपुस्तकहरू सिधै किन्ने सुविधा दिन्छ।

स्पोटीफाईले नयाँ ब्रिफमा लेखे अनुसार, “२०२५ को आदेशले विकासकर्ताहरू र — अझ महत्वपूर्ण रूपमा — उपभोक्ताहरूलाई ठूला फाइदा पुर्‍याएको छ।”

स्पोटीफाईले आफ्नो आईओएस एपमा अद्यावधिक गरिएको “प्रिमियम डेस्टिनेशन पेज” ले निःशुल्क प्रयोगकर्तालाई सदस्यता अपग्रेड गर्ने तरिका, मूल्यबारे जानकारी र चेकआउट पेजको लिङ्क दिने गरेको बताएको छ।
स्पोटीफाईका अनुसार, यो नयाँ पृष्ठ सार्वजनिक भएको दुई सातामै आईओएस प्रयोगकर्ताहरूबीच फ्रीबाट प्रिमियममा रूपान्तरण दरमा उल्लेखनीय वृद्धि देखिएको छ।

एण्ड्रोइडमा भने यो दर लगभग स्थिर रहेको छ, जहाँ स्पोटीफाई पहिले नै मूल्य जानकारी दिन सक्दथ्यो। “यो वृद्धि एप्पलले अन्ततः २०२५ को आदेशअनुसार आदेशको पालना गरेपछि सम्भव भएको यसले प्रस्ट देखाउँछ,” स्पोटीफाईले भनेको छ।

स्पोटीफाईले श्रव्यपुस्तक बिक्रीमा पनि नयाँ विकल्पहरू सार्वजनिक भएको तीन दिनमै प्रभाव देखिन थालेको उल्लेख गरेको छ। तर पनि स्पोटीफाईले वृद्धिको सटीक आँकडा भने साझा गर्न नमानेको टेकक्रञ्चले उल्लेख गरेको छ।

स्पोटीफाईको यो ब्रिफ माइक्रोसफ्ट लगायत अन्य कम्पनीहरूको समर्थनमा थपिएको हो, जसले एप्पल विरुद्ध एपिक गेम्सको पक्षमा अदालतमा आफ्नो मत दिइरहेका छन्।

एप्पलले यो निर्णय पूर्णरूपमा कानुनी रूपमा टुंगो नलागेसम्म पालन नगर्ने अडान राख्दै निर्णयविरुद्ध अपिल प्रक्रिया अघि बढाइरहेको छ।

एप्पल ले एपिक गेम्सको फोर्टनाइटलाई एप स्टोरमा राख्न पनि अस्वीकार गरेको थियो, तर न्यायाधीशले त्यसविरुद्ध पुनः अदालत आउन वा गेमलाई पुनः स्टोरमा राख्न दबाब दिएका थिए।

मंगलबार, पाँच वर्षपछि फोर्टनाइट पुनः अमेरिकी एप स्टोरमा सार्वजनिक गरिएको छ।

एपिक र एप्पलबीचको मुद्दा हाल अमेरिकी नवौं सर्किटको अपिल अदालतमा चलिरहेको छ। एप्पलले पुरानो नीति लागू गर्न इमर्जेन्सी मोशन दर्ता गरेको थियो, तर अदालतले त्यो अस्वीकार गर्दै नियमित प्रक्रिया अनुसार निर्णय हुने बताएको छ।