“लगभग आधा युवाहरूले इन्टरनेट बिनाको संसार रुचाउँछन्” बेलायती सर्वेक्षण

काठमाडौं ।

बेलायतमा गरिएको एक नयाँ सर्वेक्षणले लगभग आधा युवाहरूले इन्टरनेट नभएको संसारमा बस्न रुचाउने देखाएको छ।

१६ देखि २१ वर्ष उमेरका लगभग ७० प्रतिशत युवाहरूले सामाजिक सञ्जालमा समय बिताएपछि आफूहरूले नराम्रो महसुस गर्ने गरेको अनुसन्धानले खुलासा गरेको बेलायतको मिडियालाई उद्धृत गर्दै टेलिग्राफले रिपोर्ट गरेको छ।

आधा (५० प्रतिशत) युवाहरूले “डिजिटल कर्फ्यु” लाई समर्थन गरेको बताइएको छ जसले राति १० बजे पछि निश्चित एप र वेबसाइटहरूमा उनीहरूको पहुँच सीमित गर्नेछ। त्यसैगरी ४६ प्रतिशत युवाहरूले उनीहरू इन्टरनेट बिनाको संसारमा जवान भएर बस्न रुचाउने बताएका छन्।

एक चौथाई उत्तरदाताहरूले सामाजिक सञ्जालमा दिनको चार वा बढी घण्टा बिताउने गरेको र ४२ प्रतिशत उत्तरदाताहरूले आफ्ना आमाबाबु र अभिभावकहरूलाई आफूले अनलाइन के गरिरहेका थिए भन्ने बारेमा झूट बोलेको स्वीकार गरेका छन्।

अनलाइन हुँदा, ४२ प्रतिशतले उनीहरूले आफ्नो उमेरको बारेमा झूट बोल्ने गरेको बताएका छन् भने ४० प्रतिशतले नक्कली खाता भएको स्वीकार गरेका छन् र २७ प्रतिशतले उनीहरू आफू पूर्ण रूपमा अरू कोही नै भएको नाटक गरेको बताएका छन्।

प्रविधि सचिव पिटर काइलले सरकारले टिकटक र इन्स्टाग्राम जस्ता केही एपहरूको लागि “अनिवार्य घण्टा” बनाउने विचार गरिरहेको संकेत गरेपछि यो नतिजा आएको हो।

ब्रिटिश स्ट्यान्डड्र्स इन्स्टिच्युसनद्वारा गरिएको यो अध्ययनमा १,२९३ युवाहरूको सर्वेक्षण गरिएको र जसमा २७ प्रतिशत उत्तरदाताहरूले अपरिचितहरूसँग आफ्नो अनलाइन स्थान साझा गरेको पत्ता लगाएको छ।

यसै सर्वेक्षणमा, तीन–चौथाईले महामारीको परिणामस्वरूप उनीहरूले अनलाइनमा बढी समय बिताउने गरेको बताएका छन् भने ६८ प्रतिशतले उनीहरूले अनलाइन बिताएको समय उनीहरूको मानसिक स्वास्थ्यको लागि हानिकारक भएको बताएको टेलीग्राफले उल्लेख गरेको छ।