फेमिस प्रणालीमा सुधार गरी एक घण्टाभित्र श्रम स्वीकृति दिने तयारी

काठमाडौं ।

वैदेशिक रोजगार विभागले एक घण्टाभित्रमै श्रम स्वीकृति दिने गरी तयारी गरेको छ। विभागले शुक्रबार पत्रकार सम्मेलनमार्फत वैदेशिक रोजगार सूचना व्यवस्थापन प्रणाली (फेमिस) प्रणालीमा सुधार गरी एक घण्टाभित्र श्रम स्वीकृति दिने गरी तयारी गरेको जानकारी दिएको हो।

विभागका महानिर्देशक कमलप्रसाद भट्टराईले एक साताअघिसम्म एक व्यक्तिले श्रम स्वीकृति लिन आठदेखि दश दिन लाग्ने गरेकामा अहिले सो अवधिलाई तीन दिनमा झारेको र अबको तीन/चार दिन भित्र एक घण्टा गर्ने तयारी गरेको जानकारी दिए।

वैदेशिक रोजगारीको काम कारबाहीलाई प्रविधिमैत्री बनाउन वैदेशिक रोजगार विभागले फेमिस प्रणाली प्रयोगमा ल्याएको हो। प्रणालीमा समय समयमा समस्या आउने गरेपछि श्रमिकहरू समस्यामा पर्ने गरेका छन्।

वैदेशिक रोजगारीसँग सम्बन्धित संस्थागत उजुरी फस्र्याट, राहत तथा उद्धार र क्षतिपूर्ति समयानुकूल छुट्टै निर्देशिका/कार्यविधि तर्जुमा गरी लागुु गरिने पत्रकार सम्मेलनमा जानकारी दिइएको थियो।

विश्वको कुनै पनि कुनाबाट श्रम स्वीकृतिका लागि श्रमिकले आवेदन दिँदा एक घण्टाभित्रमा श्रम स्वीकृति दिन सक्ने गरी प्रणाली सुधार हुने जानकारी दिईएको छ।