एआई उपकरणहरूले एडटेक उद्योगमा हलचल मच्चाएसँगै चेगले २२ प्रतिशत कार्यबल हटाउने

काठमाडौं ।

चेगले सोमबार आफ्नो लागत घटाउन र सञ्चालनलाई सुव्यवस्थित गर्नको लागि लगभग २२ प्रतिशत कार्यबल, वा २४८ कर्मचारीहरूलाई हटाउने बताएको छ। विद्यार्थीहरू परम्परागत एडटेक प्लेटफर्महरू भन्दा च्याटजीपीटी जस्ता एआई–संचालित उपकरणहरूमा बढ्दै गएको हुनाले चेगले यो कदम चाल्न लागेको उल्लेख गरेको छ।

ट्युटोरिङ, गृहकार्यको लागि मद्दत र पाठ्यपुस्तक भाडामा प्रदान गर्ने अनलाइन शिक्षा फर्म कम्पनी, महिनौंदेखि वेब ट्राफिकमा गिरावटसँग जुधिरहेको र यो प्रवृत्ति सुधार हुनु अघि बिग्रने सम्भावना बढी भएको चेतावनी दिएको छ।

गुगलको एआई ओभरभ्यूजको विस्तारले वेब ट्राफिकलाई यसको सर्च इकोसिस्टम भित्र सीमित राखिरहेको र सर्च (खोजहरू) लाई बिस्तारै यसको जेमिनी एआई प्लेटफर्ममा लगिरहेको चेगले बताएको छ। त्यसैगरी ओपनएआई र एन्थ्रोपिक लगायत अन्य एआई कम्पनीहरूले सदस्यताहरूमा निःशुल्क पहुँचको साथ शिक्षाविद्हरूलाई भेटिरहेको उल्लेख गरिएको छ।

सोमबार घोषणा गरिएको पुनर्संरचनाको एक भागको रूपमा, चेगले वर्षको अन्त्यसम्ममा आफ्नो अमेरिकी र क्यानडा कार्यालयहरू पनि बन्द गर्ने बताइएको छ भने यसको मार्केटिङ, उत्पादन विकास प्रयासहरूका साथै सामान्य र प्रशासनिक खर्चहरू घटाउने लक्ष्य राख्ने उल्लेख गरिएको छ।

त्यसैगरी दोस्रो र तेस्रो त्रैमासिकमा ३४ मिलियन देखि ३८ मिलियन अमेरिकी डलर सम्मको अधिकांश शुल्क लाग्ने अपेक्षा गरिएको छ।

चेगले पुनर्संरचनाका कारण सन् २०२५ मा ४५ देखि ५५ मिलियन अमेरिकी डलर र सन् २०२६ मा १०० देखि ११० मिलियन अमेरिकी डलर सम्मको लागत बचत गर्ने अपेक्षा गरेको छ।

कम्पनीले सोमबार आफ्नो पहिलो त्रैमासिकको नतिजाको बारेमा पनि रिपोर्ट गरेको छ, जसमा सदस्यहरू यस अवधिमा ३१ प्रतिशतले घटेर ३.२ मिलियन पुगेको बताएको छ। त्यसैगी राजस्व ३० प्रतिशतले घटेर १२१ मिलियन अमेरिकी डलरमा पुगेको छ भने यसको सदस्यता सेवा राजस्व लगभग एक तिहाइले घटेर १०८ मिलियन अमेरिकी डलर पुगेको रिपोर्ट गरिएको छ।

गुगलको इन्टरनेट सर्च इन्जिनले मौलिक कन्टेन्ट (सामग्री) को माग घटाउनुको साथै प्रकाशकहरूको कम्पनीको आर्टिफिसियल इन्टेलिजेन्स–जेनेरेटेड ओभरभ्यूजसँग प्रतिस्पर्धा गर्ने क्षमतालाई कमजोर पारिरहेको र जसले गर्दा आगन्तुक र ग्राहकहरूमा गिरावट आएको भन्दै चेगले गत फेब्रुअरीमा गुगललाई मुद्दा दायर गरेको रोयटर्सले रिपोर्ट गरेको छ।
डिसेम्बर ३१ तारिख सम्ममा चेगसँग १,२७१ कर्मचारी रहेको उल्लेख गरिएको छ।