प्रिमियम तथा निशुल्क प्रयोगकर्ताका लागि स्पोटीफाइले ल्यायो नयाँ फिचर

काठमाडौं ।

स्पोटीफाईले प्रयोगकर्ताको हालको संगीत सुन्ने अनुभव र प्लेलिस्ट व्यवस्थापनलाई अझ राम्रो बनाउन नयाँ अपडेटहरू सार्वजनिक गरेको छ। नाउ प्लेइङ स्क्रिनको तल देखिने क्यू विकल्पको डिजाइन परिवर्तन गरिएको छ।

स्पोटीफाईका अनुसार स्ली टाइमर, स्मार्ट शफल र रिपीटजस्ता फिचरहरू अब सजिलै पहुँचयोग्य छन्। अब प्रयोगकर्ताहरूले प्लेलिस्टको माथिल्लो भागमा एड, सर्ट लगायत अन्य नियन्त्रणहरू भेट्न सक्नेछन्, जसले ट्र्याकहरू सजिलै अनुकूलन गर्न सहयोग पुर्‍याउँछ। यी अपडेटहरू मे ७ मा घोषणा गरिएको न्युज१८ ले जनाएको छ।

यसअघि स्पोटीफाईले आफ्नो एआई प्लेलिस्ट फिचर ४० भन्दा बढी देशहरू—जस्तै बेलायत, अष्ट्रेलिया र सिंगापुर—मा विस्तार गर्ने घोषणा गरेको थियो।

स्पोटीफाई का नयाँ फिचरहरू

स्पोटीफाई प्रिमियम सदस्यहरूले अब शफल, रिपीट, स्लीप टाइमर लगायतका विकल्पसहितको नयाँ क्यू फिचर प्रयोग गर्न सक्नेछन्। जब पंक्तिमा राखिएका गीतहरू सकिन्छन्, प्लेटफर्मले स्वतः नयाँ ट्र्याकहरूको सिफारिस गर्नेछ, जसले संगीत निरन्तर बजिरहने सुनिश्चित गर्छ।

स्पोटीफाई एपको सेटिङमा गएर अटोप्ले र स्मार्ट शफललाई बन्द गर्न सकिने सुविधा पनि थपिएको छ। हाइड बटनलाई अझ सहज बनाइएको छ—यदि प्रयोगकर्ताले कुनै ट्र्याक मन पराएनन् भने, त्यसलाई ट्याप गरेर फेरि नबज्ने बनाउन सकिनेछ।

साथै, नयाँ स्नूज विकल्पले सिफारिस सूचीमा आएको ट्र्याकलाई अस्थायी रूपमा ३० दिनको लागि हटाउने सुविधा दिन्छ। यो फिचर हाल प्रिमियम सदस्यहरूका लागि परीक्षण चरणमा छ र चाँडै सबै प्रयोगकर्ताका लागि उपलब्ध हुने स्पोटीफाईले जनाएको छ।

मोबाइलमा प्लेलिस्ट नियन्त्रण गर्न सकिने नयाँ फिचर पनि थपिएको छ। अब प्रत्येक प्लेलिस्टको माथिल्लो भागमा एड, सर्ट र एडिट बटनहरू उपलब्ध छन्, जसले ट्र्याक सूची बनाउन, शीर्षक परिमार्जन गर्न, आफ्नै कभर आर्ट बनाउने वा ट्र्याकहरूको क्रम मिलाउन सजिलो बनाएको छ।

न्युज१८ का अनुसार स्पोटीफाईले मोबाइल एपको तल दायाँ कुनामा रहेको नयाँ (+) बटनमार्फत नयाँ प्लेलिस्ट बनाउने प्रक्रिया पनि सरल बनाएको दावी गरेको छ। प्रयोगकर्ताहरू अब एआई प्लेलिस्ट बनाउने, ब्लेण्डमा सहभागी हुने, ज्याम प्रयोग गर्ने र साथीहरूसँग सहकार्य गर्ने सुविधा पाउनेछन्। ज्याम र सहकार्य सुविधा हाल स्पोटीफाई प्रिमियम प्रयोगकर्ताहरूका लागि मात्र उपलब्ध छन्।