एआईको तीव्र विकाससँगै आईफोनहरु प्रयोगविहीन हुनेछन्-एप्पलका वरिष्ठ कार्यकारी

काठमाडौं ।

एप्पलले पछिल्ला दशकभन्दा बढी समयदेखि आइफोन बिक्री गरेर अर्बौं डलर कमाइरहेको छ। तर अब कम्पनीलाई आफ्नो भविष्यप्रति स्पष्टता छैन, किनभने एआई (कृत्रिम बुद्धिमत्ता) को विकासले यसको प्रयोगमा ठूलो प्रभाव पारिरहेको छ। अमेरिकी अदालतमा जारी गुगल सर्च एन्टिट्रस्ट मुद्दाका क्रममा एप्पलका वरिष्ठ कार्यकारी एडी क्युले केही ठूला भविष्यवाणी गरेका छन्।

उनलाई उद्धृत गर्दै भनिएको छ, “अबदेखि १० वर्षपछि तपाईंलाई आइफोन चाहिँदैन।” उनले , विशेष गरी एआई प्रविधि केही वर्षभित्रै जति द्रुत गतिमा अगाडि बढ्नेछ भन्ने कुरालाई आधार बनाउँदै आइफोनहरू पुराना हुने र अप्रासंगिक बन्ने सम्भावना औंल्याएका छन्। एप्पलले यस्ता ठूला सार्वजनिक अभिव्यक्ति सामान्यतः नगर्ने भए पनि क्यु कम्पनीको वरिष्ठ तहका व्यक्ति हुन् र उनले मुद्दाको क्रममा प्राविधिक दिग्गज कम्पनीको तर्फबाट बोलिरहेको देखिन्छ।

एप्पलले अझै पनि सिरीलाई अपेक्षित रूपमा काम गर्न बनाउने लक्ष्यh;\tf एआईसम्बन्धी चुनौती समाधान गर्न सकेको छैन। तैपनि कम्पनीले आगामी केही वर्षभित्रै एआईमा ठूलो लगानी गर्ने योजना बनाएको देखिएको छ।

अहिलेको चरणमा एआई विकासका केही संकेतहरू देखिएका छन्, यद्यपि त्यो प्रक्रिया ढिलो भइरहेको छ। एप्पलले एआईको तीव्र विकासलाई ठूलो शक्ति बन्न सक्ने सम्भावना देखेर चिन्ता गरेको कुराले कम्पनीको अर्को पक्ष पनि देखाउँछ।

न्युज१८ का अनुसार क्युले विगतमा एप्पलले आइपड अन्त्य गरेर आइफोन ल्याएको इतिहास सम्झिए। अब त्यही इतिहास फेरि दोहोरिन सक्ने उनले संकेत गरेका छन्, जहाँ एआई आउँदो दशकको मूल प्रविधि बन्ने देखिन्छ। कम्पनीले आफ्नो सबैभन्दा धेरै पैसा कमाउने उत्पादन आइफोनलाई नै अन्त्य गर्ने निर्णय गर्न सक्छ कि सक्दैन भन्ने कुरा उसकै प्रविधिको विकास र परिपक्वतामाथि भर पर्छ।

त्यस बेलासम्म भने आइफोनहरूले बजारमा आफ्नो वर्चस्व कायम राख्नेछन् र एप्पललाई ठूलो आम्दानी गराइरहनेछन्। कम्पनीले भारतजस्ता बजारहरूमा आगामी वर्षहरूमा वृद्धिको ठूलो सम्भावना देखेको छ, किनभने मुख्य बजारहरूमा अहिले माग स्थिर अवस्थामा पुगेको छ र प्रत्येक नयाँ संस्करणले पहिले जस्तो चासो पैदा गर्न छाडेको छ।

यति भनेपछि पनि, क्युका यी टिप्पणीहरूले एप्पललाई उद्योगको सानो हिस्सा जस्तो देखाउने प्रयास भइरहेको हुनसक्छ भन्ने अड्कल गर्न सकिन्छ, ताकि नियामक निकायहरूको थप निगरानीबाट बच्न सकियोस्।