डिजिटल कुलतबाट निस्किन सहयोग गर्ने चलचित्र ‘झिल्को’

काठमाडौं ।

मानिसको जीवनमा मोबाइल अभिन्न हिस्सा बनिसकेको छ। एक समय थियो जब मोबाइल केवल सम्पर्कको माध्यम थियो, तर आज त्यो जीवनशैली निर्धारण गर्ने शक्तिमा परिणत भएको छ। डिजिटल कुलतको लतमा बालबालिका पनि परिरहेका छन्।

खाना खानुभन्दा पहिले मोबाइल चलाउनु, अनलाइन गेम र युट्युबमा श्रव्यदृश्य हेर्नु बालबालिकाका लागि सामान्य भइसकेको छ। यी र यस्तै विषयलाई समेटेर निर्देशक यादव भट्टराईले चलचित्र ‘झिल्को’ तयार गरेका छन्। चलचित्रमा आयुषी ढकाल, विशाल पोखरेल, वर्षा सिवाकोटी, सुनिल पोखरेल लगायतका कलाकारले अभिनय गर्नुभएको छ। टेलिशृङ्खला हुँदै चलचित्रमा अभिनय गर्न थालेका अभिनेता पोखरेलले चलचित्र गरेर आफूले नयाँ विषयमा ज्ञान पाएको बताए।

उनले भने, “अहिले मैले आफूलाई डिजिटल कुलतबाट केही भए पनि बाहिर ल्याउन सकेको जस्तो लागेको छ। यो चलचित्रमा अभियन गर्नु अगाडि र अहिलेको सोचमा निकै परिवर्तन आएको छ। यसबाट हामीभन्दा नयाँ पुस्ता र विशेष गरी बालबालिकालाई बचाउनु जरुरी छ।”

चलचित्रमा अभिनय गर्ने तय भएपछि उनी आफैँले सामाजिक सञ्जालमा उपस्थिति कम गर्न थाले। आफ्नो घरमा बच्चालाई डिजिटल उपकरणसँग निकै कम पहुँच दिन थाले। यसले विस्तारै आएको परिवर्तनलाई उनले महसुस गरेका छन्।

“अहिले मेरो घरमा राति सुत्ने बेलामा लगभग ११ बजे ‘वाइफाइ राउटर’ बन्द हुन्छ। त्यो बिहान मात्र खुल्छ। मैले सुरुआती समयमा बच्चालाई मनाउन कठिनाईको सामना गर्नुपरे पनि विस्तारै उनीहरूको दिनचर्या र शैलीमा परिवर्तन आउन थालेको छ। यो चलचित्रको उद्देश्य ‘भर्चुअल संसार’ बाट बाहिर निकालेर वास्तविक संसारमा रमाउन सिकाउनु हो”, अभिनेता पोखरेलले भने।

उनले चलचित्रमा वास्तविक जीवनसँग नजिक रहेको पात्रलाई निर्वाह गरेका छन्। पिताको पात्रमा अभिनय गर्दा उनले आफ्नै अनुभवलाई प्रयोग गरे। त्यसकारण पनि पात्र जीवन्त देखिएको उनको बुझाइ छ। “म आफू पिता पनि भएकाले मैले त्यो भावनालाई पर्दामा ल्याउन सकेको छु जस्तो लागेको छ। यो चलचित्र अभिभावक र बच्चाले हेर्नुपर्ने बनेको छ। किनकि यसमा मनोरञ्जनसँगै हामीलाई डिजिटल कुलतले दिइरहेको समस्या र यसले बढाएको सामाजिक दुरीका विषयलाई कथानकका रुपमा प्रस्तुत गरिएको छ”, उनले भने।

यो चलचित्रको विषयमा कुरा हुँदा उनले चलचित्रले पार्ने प्रभाव र विषयको गम्भीरतालाई बुझ्नुभएको थिएन। तर, चलचित्रसँग जोडिदै गएपछि कलाकारिता यात्रामा निकै राम्रो काम गरेको अनुभव उनले गरिरहेका छन्।

“यो केवल चलचित्र मात्र होइन, यसको विषयले केही परिवारलाई डिजिटल लतबाट मुक्त गर्न सकियो भने हाम्रो अभियान सफल हुन्छ”, उनले भने।
चलचित्र ‘झिल्को’ले आजको डिजिटल कुलतमाथि प्रश्न गरेको छ। डिजिटल उपकरणले हाम्रो जीवनशैलीलाई विकृत बनाइरहेको निर्देशक भट्टराईको बुझाइ छ। डिजिटल कुलतले एउटा सामान्य परिवार र बालबालिकामाथि कस्तो असर पार्छ भन्ने कथा चलचित्रमा प्रस्तुत गरिएको निर्देशक भट्टराईले बताए।

“आज हामी डिजिटल कुलतलाई सामान्य ठानिरहेका छौँ, तर यो आगोको झिल्को जस्तै विस्तारै हाम्रो आत्मा डढाइरहेको छ। हामीले यी संवेदनशील कथाहरू उठान गर्नु आवश्यक ठानेका हौँ। ‘झिल्को’ ले तपाईँ र तपाईँको परिवारको यथार्थसँग गहिरो रूपमा जोडिनेछ”, उनले भने।

मिडिया फर कल्चर प्रालिको निर्माणमा तयार भएको चलचित्र ‘झिल्को’ वैशाख १९ गतेबाट देशभर प्रदर्शन हुँदैछ। उक्त चलचित्रमा दीपक बज्राचार्यले छायाङ्कन, निमेष श्रेष्ठले सम्पादन, निर्देशक भट्टराईसँगै अरुणदेव जोशी र देव व्रतले कथा लेखनको काम गरेका छन्।-रासस