वर्ल्ड अफ ट्याङ्क्स गेम निर्माताको सम्पत्ति जफत गर्ने योजनामा रुसी नियामकहरु

काठमाडौं ।

वर्ल्ड अफ ट्याङ्क्स विकास गर्ने संयुक्त कम्पनीहरू वारगेमिङ र लेस्टा गेम्सका शीर्ष कार्यकारीहरूले आफ्नो कम्पनीको सेयर गुमाउन सक्ने सम्भावना रहेको रूसी सञ्चारमाध्यम आरआईए र आरबीसीले जनाएका छन्।

लेस्टा गेम्सका प्रमुख मलिक खतात्जाएभ र वारगेमिङ का प्रमुख भिक्टर किस्लीमाथि रूसको अभियोजन कार्यालय (अमेरिकाको अटर्नी जनरलको रूसी समकक्ष) ले चरमपन्थी गतिविधिमा संलग्न भएको आरोप लगाएको आरआईएको रिपोर्टमा उल्लेख गरिएको छ। अभियोजन कार्यालयले यी कार्यकारीहरूको कम्पनीमा भएको सेयर जफत गर्ने तयारी गरिरहेको बताइएको छ।

वर्ल्ड अफ ट्याङ्क्स को विकास सन् २०२२ मा विभाजित भएको थियो, जब वारगेमिङ ले रूस र बेलारुसमा रहेका कार्यालयहरू बन्द गर्दै गेमको रूसी संस्करणको विकास जिम्मा लेस्टा गेम्स लाई दिएको थियो।

सोही वर्ष रूसले युक्रेनमाथि पूर्ण आक्रमण शुरू गरेको थियो। त्यसको प्रतिक्रियामा, वारगेमिङ ले वर्ल्ड अफ ट्याङ्क्स मार्फत युक्रेनका लागि स्वास्थ्य सहायता संकलन गर्ने अभियान सन् २०२३ मा चलाएको थियो। रूसी सरकारले यसलाई युक्रेन समर्थक र रूसविरुद्धको चरमपन्थी गतिविधि मानिरहेको इन्ग्याजेटले उल्लेख गरेकफ छ।

लेस्टा गेम्स ले यस्तै आरोप किन खेप्नुपरेको भन्ने स्पष्ट नभए पनि, त्यो कम्पनी हाल पनि अभियोजन कार्यालयको क्षेत्राधिकारभित्र पर्दछ।
लेस्टा गेम्स वा वारगेमिङ दुबै कम्पनीले अहिलेसम्म औपचारिक वक्तव्य जारी गरेका छैनन्, तर लेस्टा गेम्स ले कम्पनीको टेलिग्राम च्यानलमा प्रतिक्रिया दिएको आरबीसीले जनाएको छ।

“कम्पनीले रूसी संघ र बेलारुस गणतन्त्रको कानुनअनुसार नै काम गरिरहेको छ, त्यसैले चिन्ता वा सूचना लुकाउनु पर्ने कुनै आधार हामीसँग छैन,” लेस्टा गेम्स ले लेखेको छ। “हामीले कुनै नियम उल्लंघन गरेका छैनौं र हामीलाई डराउनु पर्ने केही छैन।”