९ महिनामा नेपाल भित्रियो १ अर्ब ३१ करोडमाथिको राउटर

काठमाडौं ।

नेपालमा राउटरको आयात उल्लेख्य मात्रामा बढ्ने प्रवृत्तिले चैत महिनामा पनि निरन्तरता पाएको छ। भन्सार विभागले हालै सार्वजनिक गरेको आर्थिक वर्ष २०८१/८२ को चैत महिनासम्मको वैदेशिक व्यापारको तथ्याङ्क अनुसार १ अर्ब ३१ करोड ५६ लाख १ हजार रुपैयाँ बराबरको राउटर आयात भएको छ।

उक्त अवधिसम्म माथि उल्लिखित रकम बराबरको ५ लाख १६ हजार ७२८ थान राउटर आयात भएको विवरणमा उल्लेख छ।

फागुन महिनासम्म नेपालमा १ अर्ब २५ करोड ४८ लाख ७२ हजार रुपैयाँ बराबरको ४ लाख ८७ हजार ३२० थान राउटर आयात भएकोमा एक महिनाको अवधिमा ६० करोड ७२ लाख ९० हजार रुपैयाँ बराबरको २९ हजार ४०८ ले बढेर समग्रमा राउटर आयातको सङ्ख्या ५ लाख १६ हजार ७२८ थान पुगेको छ।

सरकारले उक्त परिमाणको राउटर आयातबाट यो अवधिमा २४ करोड ४८ लाख ६९ हजार रुपैयाँ राजश्व संकलन गरेको छ। भन्सार विभागको तथ्याङ्क अनुसार यो अवधिमा छिमेकी चीन र भारतसहित विश्वका जम्मा १४ मुलुकबाट राउटर आयात भएको छ।

यो अवधिमा सबैभन्दा बढी चीनबाट १ अर्ब २५ करोड २६ लाख ९० हजार रुपैयाँ बराबरको ४ लाख ९८ हजार २१३ थान राउटर आयात भएको छ। यसैगरी ताइवानबाट ६५ लाख २१ हजार बराबरको ९०६ थान, भारतबाट १ लाख ३१ हजार बराबरको १९८ थान, भियतनामबाट ५ करोड ४९ लाख ३७ हजार बराबरको १७ हजार ३४७ थान र इटलीबाट २ लाख ४२ हजार बराबरको ५० थान राउटर आयात भएको छ।

यसैगरी पोर्चुगलबाट ३ लाख ७५ हजार रुपैयाँ बराबरको २ थान, अमेरिकाबाट ६७ हजार बराबरको २ थान, सिंगापुरबाट २ हजार बराबरको १ थान, फ्रान्स तथा चेक रिपब्लिकबाट क्रमश: २ लाख ५४ हजार र ५६ हजार बराबरको समान २-२ थान तथा क्यानडा, हङकङ, मेक्सिको र कतारबाट समान १-१ राउटर आयात भएको छ जसको मूल्य शून्यदेखि २ लाख ८३ हजारसम्म रहेको प्रतिवेदनमा उल्लेख छ।