अमेरिकाले चीनमा चिप निर्यात नियम कडा पार्दा एनभिडियाले ५.५ अर्ब अमेरिकी डलरको क्षति व्यहोर्नु पर्ने अनुमान

काठमाडौं ।

अमेरिकी सरकारले चीनमा निर्यात नियमहरू कडा बनाएको कारण माइक्रोचिप निर्माता एनभिडियाले ५.५ अर्ब अमेरिकी डलर (४.२ अर्ब पाउन्ड) गुमाउने बताएको छ।

आर्टिफिशियल इन्टेलिजेन्स (एआई) बूमको केन्द्रमा रहेको चिप उत्पादन गर्ने विशाल कम्पनीले आफ्नो एच२० एआई चिप चीनमा निर्यात गर्न इजाजतपत्र आवश्यक पर्ने भएको छ जुन यसको सबैभन्दा लोकप्रिय मध्ये एक हो।

अमेरिका र चीन बीचको बढ्दो व्यापार युद्धको बीचमा यी नियमहरू आएको बताइएको छ जसमा दुवै देशहरूले विभिन्न सामानहरूमा एकअर्कामाथि चर्को व्यापार शुल्क लगाएका छन्।

एनभिडियाको शेयर आफ्टर–आवर्स ट्रेडिंगमा लगभग ६ प्रतिशतले घटेको उल्लेख गरिएको छ।

गत हप्ता अमेरिकी सरकारले कम्पनीलाई एच२० चिप हङकङ सहित चीनमा बिक्री गर्नका लागि अनुमति आवश्यक पर्नेछ भनि बताएको एनभिडियाले मंगलबार उल्लेख गरेको छ।

संघीय अधिकारीहरूले टेक जायन्टललाई लाइसेन्स (इजाजतपत्र) आवश्यकता “अनिश्चित भविष्यको लागि लागू हुनेछ” भनेर सल्लाह दिएको कम्पनीले बताएको छ।

“इजाजतपत्र आवश्यकताले कभर प्रोडक्ट (समावेश गरिएका उत्पादन) हरू चीनमा सुपर कम्प्युटरमा प्रयोग गर्न वा डाइभर्ट गर्न सकिने जोखिमलाई सम्बोधन गर्दछ भन्नेतर्फ सरकारले संकेत गरेको छ” भनि एनभिडियाले बताएको छ।

बीबीसीले सम्पर्क गर्दा कम्पनीले थप टिप्पणी गर्न अस्वीकार गरेको उल्लेख गरिएको छ।

काउन्टरपोइन्ट रिसर्च कन्सल्टेन्सीका मार्क आइन्स्टाइनले एनभिडियाको अनुमानित ५.५ अर्ब अमेरिकी डलरको घाटा उनको अनुमानसँग मेल खाएको बताएका छन्।

“यो निश्चित रूपमा धेरै पैसा भए पनि, यो एनभिडियाले वहन गर्न सक्ने कुरा हो” उनले भने।

“तर हामीले पछिल्ला केही दिन र हप्ताहरूमा देखे अनुसार, यो धेरै हदसम्म बार्गेनिङ रणनीति हुन सक्छ। निकट भविष्यमा ट्यारिफ नीतिमा केही छुट वा परिवर्तनहरू देखेर म छक्क पर्ने छैन, किनकि यसले एनभिडियालाई मात्र नभई सम्पूर्ण अमेरिकी सेमिकन्डक्टर इकोसिस्टमलाई असर गर्छ” आइन्स्टाइनले थप उल्लेख गरे।

अमेरिका–चीन बीचको प्रविधि सर्वोच्चताको दौडमा चिप्स युद्धभूमि बनेको छ, र अमेरिकी राष्ट्रपति डोनाल्ड ट्रम्प अब एक अत्यन्त जटिल र नाजुक उत्पादन प्रक्रियालाई टर्बोचार्ज गर्न चाहन्छन् जसलाई अन्य क्षेत्रहरूले दशकौं लगाएर पूर्ण बनाएका छन्।

एनभिडियाको एआई चिप्स अमेरिकी निर्यात नियन्त्रणको प्रमुख केन्द्रमा रहेको छ। सन् १९९३ मा स्थापित, यो मूल रूपमा विशेष गरी कम्प्युटर गेमहरूको लागि ग्राफिक्स प्रोसेस गर्ने कम्प्युटर चिप्स बनाउनको लागि परिचित थियो।

एआई क्रान्ति भन्दा धेरै अघि, यसले मेसिन लर्निङलाई मद्दत गर्ने सुविधाहरू चिप्समा थप्न थालेको थियो। व्यापारिक संसारमा एआई–संचालित प्रविधि कति छिटो फैलिरहेको छ भनेर बुझ्नको लागि अब यसलाई एउटा प्रमुख कम्पनीको रूपमा हेरिने गरिएको बताइएको छ।

अन्य च्याटबटहरूको लागतको एक अंशमा निर्माण गरिएको चिनियाँ प्रतिद्वन्द्वी एआई एप डीपसिकका कारण जनवरीमा कम्पनीको मूल्यमा धक्का लागेको रिपोर्ट गरिएको छ।

त्यतिबेला, अमेरिका आफ्ना प्रतिद्वन्द्वीको प्राविधिक उपलब्धिबाट छक्क परेको बताइएको उल्लेख गरिएको छ।

यसको ५.५ अर्ब अमेरिकी डलर शुल्कहरू सूची, खरिद प्रतिबद्धता र सम्बन्धित भण्डारहरूको लागि एच२० उत्पादनहरूसँग सम्बन्धित हुनेछ भनि एनभिडियाले बताएको छ।

यदि प्रतिबन्धहरू कायम रहेमा अमेरिका र चीनको एआई सेमीकन्डक्टर आपूर्ति शृङ्खलाहरू “पूर्ण रूपमा अलग” हुने अपेक्षा गरेको भन्दै टेक बज चाइना पोडकास्टकी संस्थापक रुई माले बताइन्।

विशेष गरी चीनमा डाटा सेन्टरहरूको अत्यधिक आपूर्ति भएकोले “कुनै पनि चिनियाँ ग्राहकलाई अमेरिकी चिप्समा निर्भर हुनुको कुनै अर्थ छैन” भन्दै उनले थप उल्लेख गरिन्।