अमेजनको एआई भिडियो मोडलमा अब दुई मिनेटसम्मको भिडियो बनाउन सकिने

काठमाडौं ।

अमेजनले आफ्नो एआई भिडियो मोडल नोभा रील अपग्रेड गर्दै अब दुई मिनेटसम्मको भिडियो उत्पादन गर्न सक्ने क्षमता विकास गरेको छ।
नोभा रील सन् २०२४ डिसेम्बरमा सार्वजनिक गरिएको थियो र यो अमेजनको जेनरेटिभ भिडियो प्रविधितर्फको पहिलो प्रयास थियो।

अहिलेको प्रतिस्पर्धात्मक बजारमा यसले ओपनएआई, गुगललगायतका कम्पनीहरूको मोडलहरूसँग प्रतिस्पर्धा गरिरहेको छ।

टेकक्रञ्चका अनुसार नयाँ संस्करण नोभा रील १.१ ले “मल्टिशट” भिडियोहरू उत्पादन गर्न सक्छ, जसमा प्रत्येक सटमा एउटै शैली कायम रहन्छ। अमेजन वेब सर्भिस (एडब्लूएस) की डेभलपर एड्भोकेट एलिजाबेथ फुएन्टेसका अनुसार, प्रयोगकर्ताले अधिकतम ४,००० क्यारेक्टर लामो प्रोम्प्ट दिएर ६-सेकेन्डका क्लिपहरू समावेश भएका दुई मिनेटसम्मका भिडियोहरू उत्पादन गर्न सक्छन्।

नोभा रील १.१ मा “मल्टिशट म्यानुअल” नामको नयाँ मोड पनि थपिएको छ। यो मोडमा प्रयोगकर्ताले प्रोम्प्टसँगै कुनै फोटोलाई पनि प्रयोग गरेर भिडियो सटको संरचना अझ सटीक रूपमा नियन्त्रण गर्न सक्छन्।

फुएन्टेसका अनुसार, १२८० x ७२० रिजोल्युसनको छवि र अधिकतम ५१२ क्यारेक्टरको प्रोम्प्ट प्रयोग गरेर २० वटा सटसम्म भएका भिडियोहरू बनाउन सकिन्छ।

नोभा रील हाल एडब्लूएसका प्लेटफर्म र सेवाहरू—जस्तै अमेजनको एआई विकास उपकरण बेडरकमार्फत मात्र उपलब्ध छ, र प्रयोग गर्न इच्छुक ग्राहकहरूले विशेष अनुमति माग्नुपर्छ।

अन्य जेनरेटिभ एआई प्रणालीहरूजस्तै, नोभा रीलसम्बन्धी पनि यसले प्रयोग गरेका डाटाहरूको नैतिकतामाथि प्रश्न उठिरहेका छन्।

यस्ता मोडलहरूलाई लाखौँ भिडियो उदाहरणहरूमा प्रशिक्षण दिइन्छ, तर कतिपय कम्पनीहरूले अनुमति नलिईकनै कपिराइटेड भिडियो सामग्री प्रयोग गर्ने गरेका छन्, जसका कारण मोडलले त्यस्ता सामग्री दोहोर्‍याउँदा प्रयोगकर्तालाई बौद्धिक सम्पत्ति उल्लङ्घनको मुद्दा लाग्न सक्ने टेकक्रञ्चले उल्लेख गरेको छ।

अमेजनले नोभा रीलको प्रशिक्षणमा कुन स्रोत प्रयोग गरियो भन्ने खुलाएको छैन तर कम्पनीले आफ्नो इन्डेम्निफिकेसन नीति अनुसार एडब्लूएस ग्राहकहरूलाई कपिराइट उल्लङ्घनको आरोप लागेमा कानुनी रूपमा संरक्षण गर्ने जनाएको छ।