मस्कमाथि मुद्दा दायर गर्ने विषयको विरुद्ध एकमात्र मत अन्तरिम सेक्युरिटिज एण्ड एक्सचेञ्ज कमिशनका प्रमुखको परेको खुलासा

काठमाडौं ।

जनवरी महिनामा रिपब्लिकनहरूले अमेरिकी सेक्युरिटीज एण्ड एक्सचेन्ज कमिशनको प्रमुख पद सम्हालेका केही दिन अघि एजेन्सीका पाँच कमिशनरहरूले एलोन मस्कविरुद्ध मुद्दा दायर गर्ने बारेमा बन्द बैठकमा मतदान गरेका थिए।

सन् २०२२ देखि एजेन्सीले राष्ट्रपति डोनाल्ड ट्रम्पका निकट मित्र अर्बपति मस्कले ट्विटरको सेयर खरिदको बारेमा अत्यधिक ढिलो जानकारी दिएर सेक्युरिटीज कानूनको उल्लङ्घन गरे कि गरेनन् भन्ने जाँच गर्दै आएको थियो। मस्कले त्यो वर्ष कम्पनीको अधिग्रहण गर्नु अघि सेयर खरिद गरेको कुरा सार्वजनिक गरेका थिए।

पाँच कमिशनरमध्ये रिपब्लिकन हेस्टर पियर्ससहित चार जनाले मुद्दा दायर गर्नका लागि मतदान गरेका थिए। पाँचौँ कमिशनर अर्थात् रिपब्लिकन मार्क उएडा जो अहिले एसईसीका कार्यवाहक प्रमुख छन्, उनले विरोध जनाएका स्रोतहरूको हवाला दिँदै रोयटर्सले उल्लेख गरेको छ।

४-१ को पक्षमा मतदान भएको हप्ता पछि एसईसी ले जनवरी १४ मा मस्कविरुद्ध मुद्दा दायर गर्यो।

मतदानको केही दिनअघि, उएडाले मस्कको मुद्दामा संलग्न कार्यकारी स्टाफलाई यो मुद्दा राजनीति द्वारा प्रेरित नभएको प्रतिज्ञा गर्न दबाब दिएका थिए। यो प्रयास पहिलो पटक ब्लूमबर्ग न्यूजले रिपोर्ट गरेको थियो। तर, स्टाफले प्रतिज्ञामा हस्ताक्षर गर्न अस्वीकार गरे, किनकि यो एसईसीको सामान्य अभ्यास होइन।

दुई स्रोतहरूका अनुसार उएडा र उनका रिपब्लिकन साथी पियर्सले एसईसीले मस्कसँग के चाहेको थियो भन्ने कुरामा असहमत थिए – जसमा १५० मिलियन डलरको अनुचित सम्पत्ति र एक जरिवाना फिर्ता दिने प्रस्ताव थियो। त्यसपछि पनि, पियर्सले तीन डेमोक्र्याटहरूको साथ मतदान गरेर मुद्दा दायर गर्न सहमति जनाए।

एसईसीका एक प्रवक्ताले एजेन्सीको तर्फबाट मतदान वा मस्कको मुद्दाबारे टिप्पणी गर्न अस्वीकार गरे। एसईसीले रोयटर्सको सार्वजनिक रेकर्ड अनुरोधलाई पनि अस्वीकार गर्यो। पियर्स, मस्क, उनका वकिल र ह्वाइट हाउसले रोयटर्सका प्रश्नहरूको उत्तर दिएनन्।

अमेरिकी कानून अनुसार, कुनै लगानीकर्ताले कम्पनीको ५ प्रतिशतभन्दा बढी सेयर किन्ने हो भने, उसले त्यसको जानकारी १० दिन भित्र सार्वजनिक गर्नुपर्छ। मस्कले अप्रिल २०२२ मा ट्विटरको सेयर खरिदको जानकारी दिएपछि, ट्विटरको सेयर मूल्य अघिल्लो बन्दको तुलनामा २७ प्रतिशत बढ्यो।

खरिद गरेको २१ दिनपछि मात्र यसबारे मस्कको जानकारी आएको र यसका कारण  मस्कले कम मूल्यमा थप सेयर किन्न सकेका र परिणामस्वरुप उनले ट्विटरको अधिग्रहणमा १५० मिलियन डलर बचत गर्न सकेको एसईसीले बताएको छ।