मेटाद्वारा आफ्नो पहिलो इन हाउस चीप परीक्षण, एनभिडियालगायतका आपूर्तिकर्तामा भर पर्नुपर्ने बाध्यता घट्दै

काठमाडौं ।

फेसबुकको मालिक मेटाले कृत्रिम बुद्धिमता प्रणालीहरूलाई प्रशिक्षण दिनका लागि पहिलो स्वनिर्मित चिप परीक्षण गरिरहेको छ। यो कम्पनीका लागि एक महत्त्वपूर्ण प्रगति हो किनभने यसले एनभिडियाजस्ता बाह्य आपूर्तिकर्ताहरूप्रति निर्भरता घटाउँदै आफ्नै कस्टम सिलिकन डिजाइन गर्ने दिशामा अघि बढ्न मद्दत गरिरहेको छ ।

विश्वकै सबैभन्दा ठूलो सामाजिक सञ्जाल कम्पनी मेटाले सानो स्तरमा चिप प्रयोग गर्न थालेको छ र यदि परीक्षण सफल भए उत्पादन बढाएर व्यापक रूपमा प्रयोग गर्ने योजना बनाएको छ।

रोयटर्सका अनुसार स्वनिर्मित चिप विकास गर्ने अभियान मेटाको दीर्घकालीन योजनाको हिस्सा हो, जसको उद्देश्य कम्पनीको महँगो पूर्वाधार लागत घटाउनु हो। मेटाले एआई उपकरणहरूमा ठूलो लगानी गरिरहेको छ, जसले कम्पनीको वृद्धिलाई अघि बढाउने अपेक्षा गरिएको छ।

इन्स्टाग्राम र व्हाट्सएपको समेत मालिक रहेको मेटाले २०२५ को कुल खर्च ११४ अर्ब देखि ११९ अर्ब डलर पुग्ने अनुमान गरेको छ जसमा एआई  पूर्वाधारका लागि मात्र ६५ अर्ब डलरसम्म पूँजीगत खर्च समावेश छ।

स्रोतहरूमध्ये एकका अनुसार मेटाको नयाँ प्रशिक्षण चिप एक समर्पित एक्सेलेरेटर हो, जसको मतलब यो विशेष रूपमा एआई कार्यका लागि मात्र डिजाइन गरिएको छ। यस प्रकारको चिपले जीपीयूमा आधारित एआई प्रोसेसिङको तुलनामा कम उर्जामा उच्च दक्षता प्रदान गर्न सक्छ।

मेटा ताइवानस्थित चिप निर्माता टीएसएमसीसँग मिलेर यो चिप उत्पादन गरिरहेको छ।

परीक्षण प्रयोग सुरू हुनुअघि मेटाले चिपको पहिलो “टेप-आउट” पूरा गरेको थियो, जुन चिप विकास प्रक्रियाको प्रमुख चरण हो। यसमा प्रारम्भिक डिजाइनलाई उत्पादन कारखानामा पठाउने कार्य समावेश हुन्छ। टेप-आउट पूरा गर्न करोडौं डलर खर्च लाग्छ र तीन देखि ६ महिना समय लाग्न सक्छ।

परीक्षण असफल भएमा, समस्या पहिचान गरी प्रक्रियालाई दोहोर्याउनु पर्ने हुन्छ। मेटा र टीएसएमसीले भने यसबारे कुनै टिप्पणी गर्न अस्वीकार गरेका रोयटर्सले उल्लेख गरेको छ।