डाटा सेन्टर तथा क्लाउड सेवा प्रदायकहरुलाई सूचीकृत हुन सूचना प्रविधि विभागको आव्हान

काठमाडौं ।

सरकारले डाटा सेन्टर तथा क्लाउड सेवा प्रदायकहरुलाई सूचीकृत गर्ने भएको छ। सूचना प्रविधि विभागले हालै सार्वजनिक सूचना जारी गर्दै नेपालमा सञ्चालिन सबै डाटा सेन्टर तथा क्लाउड सेवा प्रदायकहरुलाई सूचीकृत हुन भनेको छ।

विभागकाअनुसार, सूचना प्रविधिको प्रयोग मार्फत सरकारी, सार्वजनिक र निजी क्षेत्रबाट सिर्जना भएका डाटाहरूको सुरक्षित तथा गोपनीय तवरले देशभित्र भण्डारण गर्न प्रोत्साहित गर्ने तथा डाटा सेन्टर र क्लाउड सेवा प्रदायकहरूलाई सूचीकृत गर्नका लागि सूचना प्रविधि प्रणालीलाई भरपर्दो, सुरक्षित एवं प्रभावकारी रुपमा सञ्चालन गर्न ‘डाटा सेन्टर तथा क्लाउड सेवा (सञ्चालन तथा व्यवस्थापन) निर्देशिका, २०८१ गएको माघ १५ गते जारी भएको छ।

निर्देशिकाको दफा ३ बमोजिम डाटा सेन्टर तथा क्लाउड सेवा प्रदायकले सेवा प्रदान गर्नुपूर्व विभागमा सूचीकृत हुनुपर्ने व्यवस्था भएअनुसार सूचीकृत हुन विभागले सबैलाई आव्हान गरेको हो।

“यो निर्देशिका प्रारम्भ हुँदाका बखत सञ्चालनमा रहेका डाटा सेन्टर सञ्चालकले दफा ३ को उपदफा (२) बमोजिमका तथा क्लाउड सेवा सञ्चालकले सोही दफाको उपदफा (३) बमोजिमका कागजात संलग्न गरी यो निर्देशिका प्रारम्भ भएको छ महिना भित्र उपदफा (२) वा (३) सँग सम्वन्धित कागजात सहित अनिवार्य रुपमा विभागमा सूचीकृत हुन निवेदन दिनु पर्ने पर्ने व्यवस्था छ। तसर्थ उक्त निर्देशिकाको दफा ३ ले तोके बमोजिम सूचिकृत हुन डाटा सेन्टर र क्लाउड सेवा प्रदायक संस्थाले तोकिएका कागजात सहित यस विभागमा निवेदन दिनु हुन,” उक्त सूचनामा भनिएको छ।

डाटा सेन्टर तथा क्लाउड सेवा’ (सञ्चालन तथा व्यवस्थापन) निर्देशिका, २०८१ र यस सम्बन्धमा थप जानकारी विभागको वेभसाइटमार्फत प्राप्त गर्न सकिने जनाएको छ।

बुधबार मात्रै, नेपाल राष्ट्र बैंकले नयाँ निर्देशिका जारी गर्दै भुक्तानी सेवा प्रदायकहरुले विभागमा सूचीकृत संस्थाहरुसँग मात्र आफ्नो डाटा सेन्टर राख्न पाईने नियम लागू गरेको छ।

सम्बन्धित समाचार-

भुक्तानी सेवा प्रदायकले सूचना प्रविधि विभागमा सूचीकृत सँस्थासँग मात्र डाटा सेन्टर राख्न पाउने