नेपालकै पहिलो ई-स्पोर्ट्स च्याम्पियनसीप दशरथ रंगशालामा सञ्चालन हुँदै

काठमाडौं ।

ई-स्पोर्ट्स नेशनल च्याम्पियनसिप प्रतिस्पर्धा काठमाण्डौँमा सुरु भएको छ। नेपाल ई-स्पोर्ट्स संघ (ईएसएएन) ले आयोजना गरेको ‘ई-स्पोर्ट्स नेशनल च्याम्पियनशिप’ काठमाडौंको त्रिपुरेश्वरस्थित दशरथ रंगशालाको कभर्डहलमा चलिरहेको प्रतिस्पर्धा फागुन १० गतेसम्म हुनेछ।

नेपालमा पहिलो पटक आयोजना गरिएको उक्त ३ दिने ई-स्पोर्ट्स नेशनल च्याम्पियनसिपमा नेपालका शीर्ष ई-स्पोर्ट्स खेलाडीहरूले पब्जी मोबाइल, डोटा २, भ्यालोरान्ट, मोबाइल लेजन्ड्स, ब्याङ्ग ब्याङ्ग, र ई–फुटबल जस्ता मोबाइल गेमहरू सहित ६ प्रमुख ई–गेमिङका लागि प्रतिस्पर्धा गर्दैछन्।

पब्जीतर्फ कुल १६ टिमले प्रतिस्पर्धा गर्ने र प्रत्येक टिममा चार जना खेलाडी रहने बताइएको छ। पहिलो र दास्रो गरी पब्जी अङ्कतालिकाको आधारमा दुई राउण्ड खेलाइने आयोजकले जानकारी दिएका छन्।

त्यसैगरी डोटा २, मोबाइल लेजन्ड्स र भ्यालोरान्टका लागि २ टिमका पाँच–पाँच जना खेलाडी प्रतिस्पर्धा गर्दैछन्।

ई–फुटबल एरिनाको लागि भने १७ हजार खेलाडीहरुले दर्ता गरेको र उनीहरुले कुल २ लाख दश हजार धनराशीको लागि प्रतिस्पर्धा गर्ने बताईएको छ।

च्याम्पियनशिपको कुल पुरस्कार राशी २५ लाख रुपैयाँ रहेको छ, जुन यो नेपाल ई–स्पोर्टस इतिहासकै सबैभन्दा ठूलो पुरस्कार रकम हो। ६ ओटा विधामा विजेता र उपविजेताहरूलाई पुरस्कार प्रदान गरिने छ।

प्रतियोगीहरूले सामसङको भर्खरै लन्च गरिएको ग्यालेक्सी एस२५ अल्ट्रा स्मार्टफोनहरूमा खेलहरु खेल्ने बताइएको छ।

ई-स्पोर्ट्स प्रतियोगिताहरू बाहेक, कार्यक्रममा कुमा सागरलगायतका लोकप्रिय कलाकारहरूको प्रत्यक्ष प्रस्तुतिका साथै खाना स्टलहरू, अन्तरक्रियात्मक अनुभवहरू र मनोरन्जन गतिविधिहरू पनि रहने जनाएको छ।