टेल्स्ट्राले इन्टरनेटको गतिबारे गलत सूचना दिएको अष्ट्रेलियाको संघीय अदालतको ठहर

काठमाडौं ।

अष्ट्रेलियाको संघीय अदालतले टेलिकम कम्पनी टेल्स्ट्राले आफ्ना ग्राहकहरूलाई ब्रोडब्यान्ड योजनाको अपलोड गति घटाइएको बारेमा गलत सूचना दिएको ठहर गरेको छ देशको प्रतिस्पर्धा नियामक निकाय अस्ट्रेलियन कम्पिटिशन एण्ड कञ्जुमर कमिशन (एसीसीसी) ले शुक्रबार जानकारी दिएको छ।

एसीसीसीले डिसेम्बर २०२२ मा टेलस्ट्राविरुद्ध मुद्दा दायर गरेको थियो। नियामकका अनुसार, टेलस्ट्राले अक्टोबर र नोभेम्बर २०२० मा करिब ९,००० आवासीय ग्राहकहरूको ब्रोडब्यान्ड अपलोड गति कम गर्यो, तर त्यसबारे उनीहरूलाई कुनै जानकारी दिएन, न त शुल्क नै घटायो।

“टेलस्ट्राले ग्राहकहरूलाई सेवामा गरिएको परिवर्तनबारे जानकारी नदिँदा उनीहरूलाई नयाँ स्थितिअनुसार निर्णय गर्ने अवसरबाट वञ्चित गर्यो,” एसीसीसी आयुक्त लिजा कार्भरले एक विज्ञप्तिमा बताइन्।

एसीसीसीले कम्पनीविरुद्ध जरिवाना, उपभोक्ता क्षतिपूर्ति, र अन्य आदेशहरू माग गरेको छ। अदालतले यसबारे अन्तिम निर्णय पछि कुनै तोकिएको मितिमा गर्नेछ।

“हामी देशकै सबैभन्दा ठूलो खुद्रा ब्रोडब्यान्ड सेवा प्रदायकबाट यस्तो व्यवहारको अपेक्षा गर्दैनौं। यी ग्राहकहरूले आफूले सहमति नदिएको सेवा पाएका छन्, त्यसैले उनीहरूलाई क्षतिपूर्ति दिनुपर्छ,” कार्भरले भनिन्।

टेलस्ट्राका प्रवक्ताले रोयटर्सलाई इमेलमार्फत प्रतिक्रिया दिँदै भने, “हामी यस निर्णयबाट निराश छौँ, तर अदालतको निष्कर्षलाई सम्मान गर्छौँ। यसबारे थप कारबाही अघि हामी पूरा निर्णयको समीक्षा गर्नेछौँ।”