अस्ट्रेलियामा बालबालिकाहरूले सजिलै पार गर्न सक्छन् सामाजिक सञ्जाल प्लेटफर्महरूले तोकेको न्यूनतम उमेर सीमा

काठमाडौं ।

अस्ट्रेलियामा बालबालिकाहरूले सामाजिक सञ्जाल प्लेटफर्महरूले तोकेको न्यूनतम उमेर सीमा सजिलै पार गर्न सक्ने देखिएको छ। देशको अनलाइन सुरक्षासम्बन्धी नियामक निकायको एक रिपोर्टले बिहीबार यो खुलासा गरेको हो। यो रिपोर्ट सरकारले १६ वर्षभन्दा कम उमेरका बालबालिकाहरूलाई सामाजिक सञ्जाल प्रयोग गर्न नदिने तयारी गरिरहेकै बेला सार्वजनिक भएको हो।

ईसेफ्टीको रिपोर्टले ८ देखि १५ वर्ष उमेर समूहका बालबालिकाहरूको सामाजिक सञ्जाल प्रयोगसम्बन्धी राष्ट्रिय सर्वेक्षणका नतिजा र आठवटा सेवाहरू (अल्फाबेटको यूट्युब, मेटाको फेसबुक, अमेजनको ट्विच लगायत) का प्रतिक्रियाहरूलाई समेटेको छ।

रोयटर्सका अनुसार अस्ट्रेलियाले १६ वर्षभन्दा कम उमेरका बालबालिकाहरूलाई सामाजिक सञ्जाल प्रयोग गर्न नदिने निर्णय गत नोभेम्बरमा पारित गरेको थियो। यो कानुन २०२५ को अन्त्यतिर लागू हुनेछ।

सामान्यतया, सामाजिक सञ्जाल कम्पनीहरूले १३ वर्षभन्दा कम उमेरका व्यक्तिहरूलाई आफ्नो प्लेटफर्म प्रयोग गर्न अनुमति दिँदैनन्।

रिपोर्टका अनुसार २०२४ मा अस्ट्रेलियाका ८ देखि १२ वर्ष उमेर समूहका ८० प्रतिशत बालबालिकाहरूले सामाजिक सञ्जाल प्रयोग गरेका थिए। सबैभन्दा लोकप्रिय प्लेटफर्महरू यूट्युब, टिकटक, इन्स्टाग्राम र स्न्यापच्याट थिए।

रिपोर्ट अनुसार रेडिटबाहेक सबै सेवाहरूले दर्ता गर्दा जन्ममिति मागे पनि ती सबैले प्रयोगकर्ताको स्वघोषणामै भर परेका थिए र अन्य कुनै उमेर पुष्टि गर्ने उपकरण प्रयोग गरेका थिएनन्।

“सरकारको न्यूनतम उमेरसम्बन्धी कानुन लागू हुने तयारी भइरहेका बेला केवल स्वघोषणामा भर पर्ने सामाजिक सञ्जाल प्लेटफर्महरूले अझै धेरै सुधार गर्नुपर्नेछ,” ईसेफ्टी कमिस्नर जुली इनम्यान ग्रान्टले बताइन्।

यूट्युब आउँदो प्रतिबन्धबाट मुक्त रहने एकमात्र सेवा हो, किनकि यसले पारिवारिक खातासँग जोडिएको अवस्थामा अभिभावकको निगरानीमा १३ वर्षभन्दा कम उमेरका बालबालिकाहरूलाई प्रयोग गर्न अनुमति दिन्छ। तर ८ देखि १२ वर्ष उमेर समूहका बालबालिकाहरूको कुनै खातासमेत उमेर कारणले बन्द भएको देखिएको छैन।

रिपोर्टका अनुसार १६ वर्षभन्दा कम उमेरका ९५ प्रतिशत किशोरहरू कम्तीमा एउटा सामाजिक सञ्जाल प्लेटफर्म प्रयोग गर्छन्।

टिकटक, ट्विच, स्न्यापच्याट र यूट्युबले १३ वर्षभन्दा कम उमेरका प्रयोगकर्ताहरू पत्ता लगाउन उपकरणहरू प्रयोग गरे पनि अन्य सेवाहरूले त्यस्तो प्रविधि उपलब्ध हुँदाहुँदै पनि प्रयोग गरेका थिएनन्।

टिकटकका प्रवक्ताले भने, “२०२३ को सुरुदेखि हाम्रो सक्रिय उमेर पहिचान उपकरणहरूले १३ वर्षभन्दा कम उमेरका अष्ट्रेलियाली प्रयोगकर्ताहरूको १० लाखभन्दा बढी खाताहरू हटाएका छन्।”

मेटाका प्रवक्ताले भने, “बालबालिकाहरूका लागि उपयुक्त अनुभव सुनिश्चित गर्नु महत्त्वपूर्ण छ, तर उमेर प्रतिबन्ध लागू गराउने जिम्मेवारी एप स्टोरहरूको हुनुपर्छ।”

रेडिटले यसबारे टिप्पणी गर्न अस्वीकार गर्‍यो, जबकि ट्विच, स्न्यापच्याट र यूट्युबले तत्काल प्रतिक्रिया दिएनन्।

रिपोर्टमा उल्लेख गरिएअनुसार, धेरैजसो सेवाहरूले उमेर पुष्टि गर्ने प्रणाली सुधार गर्न अनुसन्धान गरेका छन्, भने केहीले १३ वर्षभन्दा कम उमेरका प्रयोगकर्ताहरूलाई रिपोर्ट गर्ने सहज विकल्प उपलब्ध गराएका छन्।